На главную страницу 
cделать стартовой   в избранное  



Культурно-просветительская газета татарской общины Республики Мордовия

Мордовия - Информационный портал Республики Мордовия - Морис.ру

Мелькужо Эрзянь Мастор - Форум Страна эрзян, эрзянский форум

Голос Эрзи


Пазёлго велесэ вастовома

Компьютерсэнь ули башка пурнавкс. Лемезэ – «Пазёлго». Потсонзо башка-башка пурнавкст эрьва иенть коряс – вейксэ иеть мельцек Пенза ёнксонь Пазёлго велень школасонть ютавтневи Тиринь келень чись. Ды вейксэ иень перть тов тердтнить инжекс монь. Сельмень икеле касыть эйкакштне: вана ансяк а умок, маряви, те цёрынесь ульнесь ципакинешка – ней алкуксонь аля! Покштне прядыть школанть, сыть тарказост таго ципакинеть ды касыть, пурныть превть, тонавтнить вечкеме тиринь келенть. 

Вечкевикс тонавтыцят ды тонавтницят, сюкпря тенк монень истямо мелень путомань кис! 

Нама, якан тов аволь чавонь кедть. Саян книгат, лиясто ламбамопельтькак. Вана тедеде ускинь тов эрзянь ды мокшонь кельс ютавтозь Од Вейсэньлувонть, казинь сынст «Чевгелина» ансамблянь аватненень. Люба баянистэсь моры шабрань мокшонь Кижеватова велень церьковасо, энялдсь: келя, эрьва Инечистэ минек озатясь ловны Библиясто саевкст рузонь, англань ды грекень кельсэ, а вана мокшокс эзь ловнокшно – а костоль. Ней, те Инечистэнть, Кижеватова велень церьковасо карми гайгеме Библиясь мокшонь кельсэяк! Пазонь валось ютавтозь уш тёжат кельтнес. Ды вана ней, окойники, сон ули эрзякс ды мокшокс! 

Эйкакштнень туртовгак ульнесть казнень. 

Кода свал, Пазёлгонь тонавтницятне ды тонавтыцятне те чинтень анокстыть ловныцянь конкурс. Седикеле, ловт, весе иетнень перть сынь ловность саевкст «Масторава» эпосонть эйстэ, зярыя иеде теде икеле натой ульнесь ёвтазь истямо яволявтома-мель: кадык, келя, ловныцянь истямо пелькстамо «Масторава» эпосонть коряс карми ютавтовомо весе Россиянть келес. А содан, кода те мелесь-бажамось срадсь? – Те шкас зярс кона ёндояк эзинь маря истямо пелькстамонть ютавтомадо. Маряви тень, ансяк Пазёлгось истя тешкстызе-совавтызе историяс прянзо. 

Тедеде Тиринь келень чись алтавсь «Сятко» эрзянь журналонтень, секс мартон вейсэ те покшчисэнть ульнесь те журналонть прявт редакторось Т.В.Разгуляева. Пелькстамосонть гайгсь Марина Слугинань стихотворениязо, кона алтавсь «Сятконтень». Ловнызе сонзэ Бодина Анастасия, кона лиссь пелькстамосонть омбоце таркас. 

Минь Татьяна Васильевна марто ёвтынек тетятненень-аватненень ды покштятненень-бабатненень, конат сакшность ваномо эсест эйкакшост лангс, вал-энялдома: кадык сынь пачтить тиринь келенть эсест нуцькаст, эйкакшост туртов. Эдь миненек а ён натой ульнесь кунсоломс, кода эрзянь велесэ эрзянь ломанесь эйкакшонзо-нуцьканзо марто кудоютксо ды лиясо-косо корты рузонь кельсэ. Кевкстнетяно: мекс тынь истя тейнетядо? Эдь бути тынсь а пачтясынк эрзянь келенть касыцятнень туртов – келесь допрок стувтови, ёми… Ломантне тень парсте чарькодить, ансяк вана кортыть: «Тонадовсь уш истя тенек…» 

Куш авардть истямо тонадомкадонть! 

А вана пелькстамосонть иестэ иес малав весе тонавтницятне примить участия. Тедеде сындест ульнесть 38 цёрынеть ды тейтерькат. Лия иетнестэ ульнесть седеяк ламо. Ды кияк а каднови казневтеме. Тень кувалма пек мелявты Александр Фёдорович Борисов, кона сови Пенза ёнксонь эрзятнень-мокшотнень культурной автономияс. Косо аволь важоде Александр Фёдорович, ков а сыргаволь, апрелень неть читнестэ, зярдо школасо ютавтови Тиринь келень чись, сон свал Пазёлгосо. Икелепелев арси эйкакштненень казнетнеде, тень туртов васня сонсь седе ламо путыль, мейле кармасть тензэ лездамо лия эрзятне ды мокшотне. Свал лезды Ногаев Иван Васильевич – сэдень теиця объединениянь генеральной директорось. Кие яви ярмакт, кие туи те чинтень ламбамопельть… 

Александр Фёдорович свал сакшны Саранскойстэ инжетнень мельгаяк, свал эйсэнек ильти мекев. Вана истя, те покшчиденть мелявтозь, ванстови ды а лепамкшни Пазёлгосо те покшчись. 

Зярдо уш ютась пелькстамось ды весе пелькстыцятне казезельть, минь тагояк саинек вал. Ней уш кортынек вана мезде: кой-кона эйкакштне ёвтнить стихтнень теке аволь эрзякс, тапить, аволь истя ёвтыть валтнэнь. Теке кодамо-бути овсе лия – аволь эрзянь кельсэ сынь ловныть стихест. Ибрагимова Алсу (сонзэ тетязо татар) ловнось эрзякс стихенть пек ваньксстэ ды парсте васняяк секс: сонзэ кудосо, нать, кортыть эрзякс эли авазо парсте мартонзо тонавтсь те стихенть. А стякояк Алсу пелькстамосонть саизе васенце тарканть. 

Ве ёндо, меремс, паро – ютавтови истямо вана Тиринь келень чи. Лия ёндо… Лия ёндо – те ансяк невтема, тешкске. А вана келесь ялатеке ёми! 

Эно газета вельде оштё пшкадян тенк, Пазёлгонь вечкевикс ломанть! Алкукс, арседеяк: курок Пазёлгосо уш кияк а марясы эрзянь келенть, бути ней покштятне-бабатне а ушодыть ды а кармить кортамо нуцькаст марто эрзякс! Кодамояк покш прявт тенек а лезды те тевсэнть, бути минсь истямо мельтемечис пратано! Эдь а ванстсынек сыця шкатнес минсенек келенть. Мезе сестэ мерить минденек сы шкань эрзятне, конат а кармить содамо эсест келест? 

Эно илядо учне ве ёндо келень ванстыцят, тынсь кортадо, тынсь ванстодо минек келенек! 

****************

Тамара БАРГОВА,

«Эрзянь правда»,3.05.2019



Р а с ь к е н ь О з к с - 2019

ЭРЗЯНЬ КЕЛЕСЬ ГАЙГСЬ МАСТОРОНТЬ КЕЛЕС

Подписка на II полугодие 2019 года

К 1 июня - Дню защиты детей

ПАГУБНАЯ СТРАСТЬ К ПЕРЕМЕНАМ

Чачома Чи марто!

Дипломат, журналист, патриот

Шемышеень басня

Протоколы заседаний инициативной группы по созданию общества «Масторава»

Пазёлго велесэ вастовома

Эрязо раськень чувтось!

ЗОВ ТОРАМЫ - 2019

Зов торамы...



главная новости архив номеров ссылки гостевая книга