На главную страницу 
cделать стартовой   в избранное  



Культурно-просветительская газета татарской общины Республики Мордовия

Мордовия - Информационный портал Республики Мордовия - Морис.ру

Мелькужо Эрзянь Мастор - Форум Страна эрзян, эрзянский форум

Голос Эрзи


ЭРЗЯНЬ КЕЛЕСЬ ГАЙГСЬ МАСТОРОНТЬ КЕЛЕС

2019 иень Эрзянь келень читнень тешкстамодонть мельёвтнема.

****

Эрзянь келень Чись кода КЕНЯРКСЧИ яволявтозель эрзянь васенце профессоронтень А.П.Рябов  кельсодыентень 100 иень тешкстамсто – 1994 иень чадыковонь 16-це чистэ. Тедеде Анатолий Павловичнень топодевельть 125 иеть. 25-ксть ютавтовсь минек масторсонть Эрзянь келень Чись. Эрьва ие сон тешкставкшнось минек буесэяк, ды минек «Восход» газетанок свал невтсь сонзэ эсензэ лопатнесэ.

Ёвтнян тыненк, вечкевикс ловныцят, сеть покшчитнеде, конатнес мон понгонинь тедедеяк.

«ТИРИНЬ КЕЛЕМ СЕХТЕ МАЗЫЙ» регионъютконь  эрзянь ды мокшонь культурань 1 фестивалесь Пикшнясоль.

Чадыковонь 14-це  чистэ минек «Пизёлнэ» морамокурось тердезель Нижней ёнксонь Болдинань буев Пикшня велев Эрзянь келень чинтень алтазь фестивалентень. Школасо важодема шкастон ламоксть Покш Игнатбуень тонавтницятне ульнесть Пикшнясо вейсэнь Эрзянь келень Чинть ютавтомасо. Сынь кадовсть тенек мельспаро валдо лецтнемакс. Ды вана ней сон кассь культурань фестивалькс. Одкстомтозь клубонтень пурнавсть пек ламо ломанть.

Тердезельть Нижней ёнксонь весе эрзякс морыця ансамблятне, эйкакштнэ, конат факультативсэ тонавтнить эрзянь келенть. Поздоровонь ёвтамо сакшность ламо прявт - мик губернаторонть пельдеяк. Пурназельть эрьва кодат невтелмат (выставкат): кедьтеевксэнь, викшнемань, раськень ярсамопелень ды лият. «Чилисема» морокурось (покшчинь ветицятне) невтсь зярыя койть. Морасть «Ялгат», «Эрзяночка», «Родники», «Чилисема», «Пизёлнэ» покшонь ды  Пикшнянь школань  эйкакшонь ансамблятне, тонавтницятне ёвтнесть валморот-стихть. Монгак ловныя эсень веледе валмором.

Эрьва номинациясо весе участниктне казезельть ДИПЛОМСО ды мазый цитниця кшнистэ теезь фестивалень ТЕШКССЭ.

Покш Игнатовань буень Эрзянь келень Чись Игнатвелень школасо.

Минек буень келень покшчись ютавтозель чадыковонь 15-це чистэнть. Сонгак ютась пек парсте ды келейстэ. Сакшность эйкакшт ды тонавтыцят велетнестэ, пурнавкшность эрзянь моронь морыця ансамблятне. Кодат вадрят стихть ды морот морасть эйкакшонок! Дивавтымизь буень школатнень морамонь номертнэ. Теке алкуксонь артистт морасть мазый эрзянь оршамосо оршазь тейтерьканок! А кода гайтевстэ гайгсть « Вастома» (Селищань), «Истоки» (Андрейвелень), «Пизёлнэ» (Покш Игнатвелень) морамокуротнес совиця  эрзянь аватнень вайгелест! Пек мельстуицят ульнесть кенярксчинь ветицятне:  Святкин Кирилл (ветясь эрзякс) ды Барсегян  Виктория (рузокс).  Весень мельс пек тусь 3 классо тонавтницятнень  ды «Пизёлнэ» ансамблянь С.М.Люлякинань «Эрзянь кель» моронть вейсэнь морамось (сон моразель репетициявтомо)!

Келень Покшчитне Саранскойсэ.

Чадыковонь 16-це чистэ Сарансо ютавтозельть келень кавто покшчить: Эрзянь ды мокшонь Раськень театрасо ды А.С. Пушкин лемсэ библиотекасо. Мон якинь омбоцентень. Ёвтаса мейс. Тосо максозель А.П.Рябовонь лемсэ Казнень лауреатонь лемесь. Тедеде сонзэ максызь Нуянь Видязнэнь  (Четвергов Евгений Владимирович) – пек содавикс эрзянь ломанентень покштояк покш эрзятнень лезэс важодеманзо кис.

Тосо моненьгак те чистэнть прась покш чансть -  казимизь Прявтказнесэ. Вана каземань конёвстонть вишка саевкс:

«Эрьва иестэнть «Руця» эрзянь лезэпаргось (сонзэ ветиесь Эрюш Вежай) ютавтни «Эрзянь вал» Интернет куросонть сёрмадома шкинемань «Эрзянь ойме» Казнес пелькстамонть. Иестэ иес истяня терявтови невтемест эрзятненень ютазь иенть перть сельме икелев нолдазь виев, превей сёрмадовкстнэнь шкиневкстнэнь, конатнесэ ули ды парсте неяви-маряви валдо эрзянь оймесь, гайтев-мазый эрзянь келесь ды эрзянь сёрмадейтнень течинь эрямо мелявксост».

Эрьва ие сёрмадейтненень Казнекс максовить Арневкст (дипломт) ды аволь покшкеть ярмаконь казнеть. Ярмактнэнь те паро эрзянь тевентень макснить «Руцяс» ансяк эсь мельсэст, ансяк эрзят ды эрзянь раськень ялгатне.

Кемеви,  эрзянь келень идема Фондось ды сонзэ «Эрзянь Мастор» кулялопазо   ушодыть од пинге ды кармить  эрязасто эскелеме  изнямонь киява.

Покш мелем ульнесь понгомс театрасо ютавтовиця покшчинтеньгак, ансяк эзь лисе тевем. Тосо тешкстазельть эрзянь келень сехте вадря тонавтыцятне. Мельспаросан Наталья Платоновань ялган кувалма, кона саизе васенце тарканть, ды лия тонавтыцятнень кисэяк.

Пурнавозь ломантненень тосо невтезель «ОД ВИЙ» эрзянь ды мокшонь эстрадной моронь фестивалень сехте вадря номертнэ. Минек Игнатбуень «Светлица» квартетэсь, конань туртов мон ютавтыя «Вечкевиксэм» моронть, кармась те покш фестивалень лауреатокс. Ды те куляськак пек кепедизе монь мелем.

«Сехте покш вечкемам – чачома мастором» панжадо занятиядонть.

Чадыковонь 17-це чистэ минь Маризь Кемаль (Кемайкина Раиса Степановна) марто тердезелинек Саран ошонь 7-це лицеев, косо важоди эрзянь келень тонавтыцякс минек велень Наталья Сергеевна Вершинина. Школасо важодема шкастон мон ветинь эрзянь келень урокт Натальямезень классо. Лездынь тензэ тонавтыцякс улема тевсэнтькак. Кода куроксто кассь те од ломаненть професиональной ёрокчизэ! Пек парсте ютавтызе Наталья «Сехте покш вечкемам – чачома мастором» панжадо занятиянзо, кона алтазель Эрзянь келень Чинтень! Школань музейсэнть сон пурнась эрьва кодат невтелмат, эйкакшонь артовкст. Седейшкава ёвтнесь тонавтыцясь эйкакштнэнень А.П.Рябовдо. Тонавтницянзо ловность валморот чачома масторонь мазычиденть, сонензэ вечкемадонть. Эйкакштнэ пек ваньксстэ ды ёжонь марязь  ёвтнесть стихень валтнэнь. Марявсь пек паро анокстамось!

Мон ёвтния, кода сась тень эрзянь келентень вечкемась, ловнынь эсень стихем ды морынь вейке мором.

Маризь Кемаль ёвтнесь эсензэ шкинемадонзо, ды седе домкасто эрзянь оршамотнеде. Наталья Сергеевна сонськак ловнось стихть ды пек парсте морызе «Эряк, тиринь мастором», моронть.  Инжетнень пельде казнекс ульнесть книгат. Невтицятнень пельде жо – покштояк покш мельспаро.

Меельцекс весе вейсэ паро мельсэ морынек «Тиринь ёнксом сехте мазый» моронть.

Эрзянь келень Чись Покш Игнатовань эйдень кужосо.

Вана уш зярыя иеть мон понгонян теке ёвксонь масторс, зярдо тердьсамизь минек велень эйдень кужос. Истя лиссь тедедеяк. Чадыковонь 18-це чистэ весе вишка эйкакшкетне ды сынст трицяст-кастыцяст оршазельть эрзянь мазый оршамосо. Актовой залось пурназель эрьва кодамо мазылмасо. Вана лиссть вишка группань эйкакшкетне. Сынст мельга, теке нармушкинеть, седе покшкетне. Ды вана сехте мазыйстэ оршазтне – школав куроксто молицятне! Лиссть икелев покшчинь ветицятне Т.И.Звонцова ды С.В.Пархаева, яволявтызь ушодоманть… Гайгить стихть, морот, эрзянь моронь гайть алга киштемат. Л.В.Семёнова ютавтызе «Чакшкеть» эрзянь кезэрень налксеманть. Ды таго – стихть, морот, киштемат… Ванат, ды стувтови: неть эйкакштнэ ансяк ушодсть тонавтнеме  эрзянь валтнэнь ды моротнень. Неяви эйдень кужонь педколлективенть покштояк покш важодемазо. Покш мельспаро те тевентень яви Михайлова Лариса Викторовна эйдень кужонь прявтоськак. Ды те сыргозти покш кемема: карми тонавтовомо тиринь келенек касыця эйкакшкетнень марто.

Тешкстаса истяжо: ульнинь эрзянь тотальной диктантонь сёрмадомасояк ды «2019 иень Библиове» мероприятиясонтькак. Тосо «Пизёлнэ» коллективесь невтизе монь 3 невтемасо «Мизолдозь паро ломантнеде» налксеманть.

Сюконян весе эрзянь ломантненень, монень неть читнестэ истямо покш мельспаронть максомга.

Свал эрязо минек мазыйдеяк мазый тиринь эрзянь келесь!

Пингеде пингес эрязо эрзянь раськесь!

Римма Жегалина,

А.П.Рябовонь лемсэ Казнень Лауреатось



Р а с ь к е н ь О з к с - 2019

ЭРЗЯНЬ КЕЛЕСЬ ГАЙГСЬ МАСТОРОНТЬ КЕЛЕС

Подписка на II полугодие 2019 года

К 1 июня - Дню защиты детей

ПАГУБНАЯ СТРАСТЬ К ПЕРЕМЕНАМ

Чачома Чи марто!

Дипломат, журналист, патриот

Шемышеень басня

Протоколы заседаний инициативной группы по созданию общества «Масторава»

Пазёлго велесэ вастовома

Эрязо раськень чувтось!

ЗОВ ТОРАМЫ - 2019

Зов торамы...



главная новости архив номеров ссылки гостевая книга