На главную страницу 
cделать стартовой   в избранное  



Культурно-просветительская газета татарской общины Республики Мордовия

Мордовия - Информационный портал Республики Мордовия - Морис.ру

Мелькужо Эрзянь Мастор - Форум Страна эрзян, эрзянский форум

Голос Эрзи


АПАК КАВТОЛДО КАВТОЛДОЗЬ. Ёвтнема. Дригань Толай

Вастневить ломанть, конат, тевень-мелявксонь неезь, сеске аймельгадыть. Мон аволь истятнэде. Эрьва тевентень а капшан нейке кундамо. Васняяк эрьва ёндо ванноса, пряудемень вийсэ трокс-кувалт, верде алов онкстнеса. Учан, паряк, мелявксось сонсь солы-нардави.

Ледстявсь тень вейке истямо тев. Сестэ ульнинь пиже цёркакс, ченьксэнть танстензэяк а содылия. Зярдо важодема таркасо васенцеде явсть тень пандовкс, мартон важодиця алюхатненень савсь венстемс колмо целковойть иредстицянть рамамс.

Варчнинек-нолштнинек превень човоргавтницянть, явовинек. Киява ютамсто эшкевинь микшнема кудос. Мерема, шкастонзо понгинь: тосо ансяк-ансяк ушодсть миеме лембе панарт... Лангс ваномс оршамопельтне пек вадряльть, ансяк микшневсть та-кода пек вишка питнесэ. Васня кецязевинь, мельга удемезэнь эшксь: «Истямо питнесэ вадря панар а рамат, муськемадо мейле нулакс илязо велявто...».

Аштян ве таркасо, секе мелявксось пряван вели...

Лисинь ушов, прявткуринканть пес ютыя. Копордынь судонь кутстиця ламбамо ведте, нолсинь кельменькайне, одов мурдынь секе микшнема кудонтень. На теть - весе панартнэнь миизь! Рамамонь мелем солась мороженоенть ладсо...

Ней шкась найманонь - весемесь ули, чиполасо а эряви аштемс. Сестэ вана...

Эно мезеяк, те эзимим синде, карминь эрямо седе тов. Сась шка урьвакстомс. Теде арсемстэ мельсэнь свал аштесь Орина. Арсинь эйстэнзэ эрьва косо ды свал: важодема таркасо, ярсамсто, куваяк лытамсто, валске сыргоземстэ ды чокшне коник лангс сяворемстэ... Ансяк кодаяк эзинь пра ве мельс эсень бажамонть марто, кавтолдынь: урьвакстомс а урьвакстомс? Мекс? Содынь: тейтеренть мельга панси Пыряй Венкаяк, конань марто ве классо тонавтнинек.

Маней превсэ чарькодинь: эряви весементь эрьва ёндо ванномс, исковамс, кинь вечкемань ёжомарямось седе виев ды ванькс, кинь - ланга-прявань... Теке марто пелинь: Венка пек покордави, эрямозо, секень вант, колави. Ванта, мон карман Орина марто вечкемань иневедьсэ экшелямо; школань ялгась - ветнень печтямо-ютавтомо тодовс сускозь. Ды мейле мень эйстэнзэ коммунизмань стявтыця?! Кодаткак бажамонзояк а кармить, оймень орма куродсы... Неть сэпей кавтолдоматне истямос пачтимизь - тейтеренть марто яла седе чуросто карминь вастневеме, эсень сельмесэ мазычизэяк прок олась. «Весемесь зярдояк ды прядови», - кеместэ тешкстыя сестэ.

Те шкас яла эрян ськамон. Апак кавтолдо ды седейризкстэме. Исяк вана чокшнень ярсамом сезезель уське вельде кортамопельсэнть. Саия кедезэнь чирькенть, марятотсь аваломанень вайгель:

- Монень эряволь Кавтаськин Миколь.

- Те  мон.  Кунсолан  пилень  стявтозь... -  пеедькшнян.

- Шумбрачи теть, Миколь! - кенярксоволь тона песэнть вайгелезэ. - Мон Орина. Содавинь?

- Сеске эзить.... Шумбрат-парт тонетькак, Оря... Кода муимик?

- Содат, исяк раминь телефононь тешксэнь од книга ды апак учо эртевинь тонь лементень. А ётавияк кода кецязевинь. Умок явовинек, Миколь... Кодаяк совак ютамсто, Анют лангс варштавлить. Те минек Венка марто васенце батюканок. Омбоце ие тензэ тусь. Совак, учомо карматано. Паряк, тоньгак нуцькат улить?..

Оринань меельце валонзо соласть стувор лангс путозь чирькесэнть... Сынь теке рицягасо лоштимизь коня ланга. Ансяк зярыя шкань ютазь карминь шождасто лексеме, оймеёжом витевсь.

Эсень койсэ чарькодинь: те мелявксоськак ваи шкань отьмас. Тозо весемесь лепами... Апак кавтолдо...

Кода лиси седе тов эрямось - мейле пачтян.



Раськень Озкс-2019

Эйзюрковонь 8-це чись - Тейтерь-авань Чи!

21 ФЕВРАЛЯ - МЕЖДУНАРОДНЫЙ ДЕНЬ РОДНОГО ЯЗЫКА

НКА – удавка на шее коренных народов России?!

Я СДЕЛАЛ ОТКРЫТИЕ

Почему на вывесках в российских городах чёрт язык сломает?

В сыктывкарских автобусах начали объявлять остановки на коми языке

СЕРДЦЕ  ЭРЗЯНЬ МАСТОР

Парадокс

Од путовкс!

АПАК КАВТОЛДО КАВТОЛДОЗЬ. Ёвтнема. Дригань Толай

Международный день родного языка в Кочкуровском районе РМ

КРИТИКАНЬ «ВЕЧКИЦЯ» ВЕРЬГИЗ. Иван Шумилкин

Валмеревкст



главная новости архив номеров ссылки гостевая книга