На главную страницу 
cделать стартовой   в избранное  



Культурно-просветительская газета татарской общины Республики Мордовия

Мордовия - Информационный портал Республики Мордовия - Морис.ру

Мелькужо Эрзянь Мастор - Форум Страна эрзян, эрзянский форум

Голос Эрзи


Сурвелень свадьба. Надежда Родионова

Прядовкс. Ушодксось «ЭМ»-нь 524-535, 537-це № №-сэ

-------

Раськень койть

Свадьбань омбоце чись.

***

Валске марто одирьванть кудос пуромить роднят. Кой-конатне наряжить цыганавакс-орожиякс, палозекс, стадань ваныцякс, лиякс-мезекс.

Урьвакстозенть кудосояк весемесь анок. Стольтне пештязь ярсамопельде ды винадо.

Ве столенть экшсэ аштить цёрат, омбоцесэнть – ават. Друк валскень сэтьмечинть коласызь баягинень дильнемат ды эрзянь гайтев морот. Марявить вайгельть-сееремат: «Инжеть сыть! Адядо вастсынек!»

Кустембес лисить од содамонть тетянзо-аванзо, свахась, уредевесь ды кудатне. Кие вина четверть кирди, кие – брага ведра, кие - ярсамопельть-каванямкат. Эрьвась снарты каванямо. Инжетнень тердьсызь кудос.

Тесэ урьвалят, роднят-малавикст. Кудавась моры:

Вай, пазчангот, пазчангот,

Учовсть минек инженек,

Вай, совадо, совадо

Сватонк лембе кудынес,

Вай, озадо, озадо

Сватонк таргазь столь экшес.

Ушодовить минень-сюнонь налксемат.Тень лемезэ «яркань вешнема». Эрьва мейсэ оршазтне велявтыть од содамонть аванзо ёнов:

Вай, Окся патякай, дугинем,

Ярканок ёмась.

Од содамонь роднятне каршост:

Кодамо яркась, паряк, минь неинек?

Кодаммо поназо, кодат тешксэнзэ?

Наряжазтне кармить ёвтнеме:

Аволь покшке, мазыйне,

Сюровтомо, алкине,

Бокинезэ ашине,

Пильгинензэ сёрмавнеть,

Сельминензэ - тештинеть.

Ойсить столь экшка. Симемадо-ярсамодо мейле кудавантень энялдыть невтемс мирде экшс лисезенть.

Боярава-кудава, азорава-кудава,

Тонь марто дуганок макснинек,

Тонь марто мазынек кучнинек,

Невтика дуганок – вансынек,

Невтика мазынек – вансынек.

Кудавась мизолдозь невти одирьванть лангс, кона уш ашти поланзо вакссо:

Вана косо ведрикшенек,

Исяк букиненек марто сась.

Сазтне, кодак несызь одирьванть прясто пангонть, кортазевить:

«Те аволь минек, минекесь а истямо. Ведрикшкенек сюровтомоль, тень сюронзо улить».

Весе пейдить-ракить.

Сазтнененьгак сась шка ойсемс столь экшка. Васенцекс озы овтось, мельганзо – весе лиятне. Овтось, кудавась аштить рядсек. Пряст ветить минекс-сюнокс, эрьва кода пеедькшнить. Кудавась вешсы гулюшанть:

Дайка, сувахай, гулюшанть,

Дайка, сувахай, нармушкам.

Тон иляк максо штадонь прят,

Тон иляк максо прянь апак сюлма.

Тон кепе пильгензэ карситя,

Штадонь прянзо сюлмика.

Одирьвань ававтось гулюшанть макссы свахантень. Уредевесь торосонзо керясы гулюшанть прянзо. Тень пингстэ пижнить-рангить: «Ой-ой-ой!»

Гулюшанть синдтресызь ды сэвсызь.

Весёлгалеманть пачк овтонть каподьсызь ды ливтьсызь ушов. Сон пижни:»У-у-у! - Озавтсызь салазкес (тельня), крандазос (сексня). Мельганзо ведрасо ливтить брага, вина ды олгонь сюлмавкс. Кода таркань ванстыцянть овтонть каванясызь. Мейле сыремтить толбандя. Кияк серьгеди: «Киртатано понат!» Олготнень кирвастьсызь. Овтонть колмоксть ютавтсызь толонть пачк – тень лемезэ «Овтонь киртамо».

Мейле таго весе совить кудос. Киштемат-морсемат.

Теде мейле народось туи одирьванть кудос. Тесэяк каванямкат-киштемат. Мейле весе срадыть эрьва кува. Кармить мучкамо кудова, кардазга, вешнеме, мезе ули кудосо, кардайсэ: пенчть-вакант,парть-очкот, саразт, реветь, вазнэть — весе, мезе понги сельме икелест ды кедь алост, ливтеме ды саеме мартост. Одирьванть пельде ломантне а максыть «саламс» улипарост. Ушодовить «сёвномкат», «тюремкат». Кой-мезенть ялатеке сайсызь, мейле велявтомс «салазенть» эрсесь пек стака.

Свадьбань колмоце чись.

Органь каяма.

Вана свадьбаськак прядома лангсо. Чопоньпелев одирьванть пельде роднятне-раськетне минень-сюнонь оршамосо велявтыть од содамонть кудов органь каямо. Кармить кардазга якамо, саразонь-галань кундсеме, сайнеме реветькак. Свадьбань койтнень коряс, тесэ вастыть эйсэст од содамонть роднятне-раськетне: сынь содыть инжетнень самодост. Анокстыть сынст вастомо брага орга чакш марто, анеявома таркава пряст кекшнезь. Зярдо совамо кармить одирьванть пельде роднятне, «азортнэ» лиснить кекшнема таркастост, ушодыть валномо-чошкаеме сыцятнень ланга брага оргасо. Тесэ ушодовить раксемат, вейке-вейке лангсо пеедькшнемат.

Мейле весень озавтсызь столь экшс. Симить-ярсыть. Киштить-морыть.

-----------------------------

Ававтонть лангсто оршамотнень сезнемат

***

Одирьвань роднятне туить кудов. Од содамонь сехте малавикс роднятне (церат, ават) пурнавить икельце кудос. Ававтонть чалгавтсызь эзем лангс. Удалонзо сти Овтось. Икелензэ гулюша марто ары сувахась. Сувахась карми кавтов синдеме гулюшанть эйсэ (теньсэ невтеви, одирьвась тееви авакс). Овтось се шкастонть ушоды минень-сюнонь апаро вайгельсэ рангомо, пракшномо ды кеверькшнеме киякс ланга. Те корты, кодамо сэредькс печти тейтересь авакс теевемстэ. Лиятне кармить сезнеме ававтонть лангсто оршамотнень. Сезнесызь сурень пес, кадсызь тунь штапо. Теке басом одирьвась таргасынзе икелев анокстазь од оршамотнень ды вельтясы ававтонзо штапо рунгонть. Перькаст аштицятне церанек-аванек пекень кундазь пейдить-ракить, весе тень лангс ванозь.

Овтось секе шкастонть саи олго коморо, кирвастьсынзе, юты весень икельга, палыця олгонь качамосонть сувтасынзе кудосо аштицятнень. Те тееви кудо потсто весе апаро вийтнень пансемаст кис.

Инжетнень ильтямсто ававтось максы каванявкст: «овтонтень» прякадо-мезде пешксе кептерь, вина сулика, свахантень – сюкорот. Свадьбась прядови.

Сурвелень икелень свадьбатнеде ёвтнесть Давыдвелень эрицясь Ксения Николаевна Кирюшкина, кона 1909-це иестэ чачсь Сурвелесэ, кулось 2001-це иестэ, Красная Зорька велень эрицясь Четайкина Елизавета Антоновна, кона 1920 иестэ чачсь Сурвелесэ, Сурвелень эрийтне Александра Николаевна Бызгаева (1923-2008), Вера Васильевна Шуляева (1926-2000) ды Пронькина Раиса Максимовна, кона чачсь 1943 иестэ Сурвелесэ.

-----------------------

Сурвелень мирденень лисемань-урьвакстомань ды раськень лемть.

***

Альне (деверь) – нинть туртов мирдень ялаксось.

Бальзя (шурин) – мирденть туртов нинть ялаксозо.

Боярава (подруга невесты) – мирденень лисиця тейтеренть малавикс ялгазо свадьбань оршамопельсэ. Одирьвась бояраваксчинзэ кадсы эсензэ ялгатненень.

Васолбаба (бабушка по матери) – эйкакшонтень аванзо авась.

Воявор (выкуп) – питне, конась максови кудатнень пельде тейтерь ёнксонсетненень шапкаст мазылгавтомань ды лиянь мезень кис, тень пингстэ пшкадекшнить моразь.

Дугай (обращение к подруге, сестре или младшему брату) – ялгинем, седе сеедьстэ вастневи пшкадема валокс од ломаннень «ялакскем» эли «сазорнэм» валтнэнь таркас.

Киял (сноха, одна из них) – лелянь-ялаксонь нить, урьват. Киялт-ялгат.

Лукша (свадебный пирог) – урьвакстыцянть ёндо мазыйстэ теезь сельмине марто покш копша(пряка). Седикеле мендильть ленгень кирькс ды путыльть потмаксозонзо чапакс. Лангозонзо каить ловсосо пидезь каша ды алт. Лукшанть мазылгавтнесызь. Ланганзо стявтнить чев сардос пезнавтозь чапакссто теезь крёсткеть, меельцекс стявтыть лангозонзо мазылгавтозь пиче тарадке.

Мирденень лисема-урьвакстома кой – свадьба.

Од цёра (жених) – урьвакстыця цёрась.

Онава (свадебная повозка) – крандазнэ. Эйсэнзэ усксильть мирдензэ кудос одирьва. Верьга вельтяви коцтсо, кона сюлмазь колмо кушаксо. Алост келейстэ сюлмазь кемгавтово суре-пуло марто цецяв шолкат. Потсонзо нурька эземне. Лангозонзо путневить сурсеме, чавачамо ды лият-мезть. Онавантень путыть одирьвань ацамот, горобиине, кона пештязь курмодо-кармодо.

Парыя (золовка) – мирдень сазор. Истя мери тейтерентень лелянзо низэ, уряжезэ.

Пенерьва (младшая сноха, жена младшего сына) – ававтонтень веженсь урьвась, веженсь цёранзо низэ.

Пола (муж или жена) – мирденть эли нинть эйстэ конаськак.

Суваха (сваха) – кудава.

Тейтерьксчи (девичество) – тейтерькс эрямо.

Уредев (помощник свахи) – покш кудантень лездыця цёра. Сон вансты одирьванть коламодо.

Урьваля (поезжанин младший) – мирденень лисиця тейтеренть лелязо, ялаксозо эли кияк лия содавиксэнзэ эйстэ. Сынь «кекшнить» одирьванть сыця кудатнеде. Пелькстнематнеде мейле патяст «мисызь» «яттнэнень-ногайтненень».

Урьнема (вопли) – мирденень лисемстэ одирьвань аварькшнема кой.

Ят (чужой) – свадьбадо икеле а содавикс ломантне, женихень ёнксотне.

***

Прядовкс.



12 преимуществ изучения иностранного языка

Раськень Озкс-2019

В.С.Брыжинскойнень - 85!

Подписка на I полугодие 2019 г.

«ЕГЭ УНИЧТОЖИЛ НАШЕ ОБРАЗОВАНИЕ НА КОРНЮ!»

2019 ГОД - ГОД ЯЗЫКОВ КОРЕННЫХ НАРОДОВ ООН

Финляндия возглавила рейтинг «хороших стран» – финны человечеству больше всего приносят пользы

ЖИВАЯ ВОДА ЭРЗЯНЬ МАСТОР

Невероятные впечатления россиян от Германии

Агония древнейшего народа мокша

Сурвелень свадьба. Надежда Родионова

Чудеса бывают!

«Книга года Марий Эл - 2018»

ВАЛТОМО. Людмила Рябова

Пеедькшнемат



главная новости архив номеров ссылки гостевая книга