На главную страницу 
cделать стартовой   в избранное  



Культурно-просветительская газета татарской общины Республики Мордовия

Мордовия - Информационный портал Республики Мордовия - Морис.ру

Мелькужо Эрзянь Мастор - Форум Страна эрзян, эрзянский форум

Голос Эрзи


Сурвелень свадьба. Надежда Родионова

Поладкс. Ушодксось «ЭМ»-нь 524-531-це № №

***

Раськень койть

***

Одирьва мельга молицятнень анокстамось

***

Урьвакстыцянь кудо. Весень чамасо кеняркс: анокстыть одирьва мельга молеме. Теске уредевеськак. Прясто пильгс сон наряжазь эрьва кодамо тюсонь лентасо, карксазь кушаксо, лавтовонзо трокс каязь нардамо, карксамосонзо – торо.

Те чистэнть валске марто од содамось саи кавто шумбра ялгат, кильди кавто виев, чуморкс лишметь, чирькентень понгавтыть баягинеть, наряжазь пиче тарад. Алашатнеяк наряжазь. Од содамось ялганзо марто озавтыть нурдос-крандазс колмо тейтерть ды кавто лангсо ардтнить келей ульцява – тонавтыть лишметнень. Уредевесь од рысаконзо лангсо арды свадьбань алашатнеде икеле (кода разведчик ды свадьбань ванстыця). Мейле кавонест лишметнесэ баяга марто туить сваханть (кудаванть) мельга. Саить мартост брага, вина сулика, тейтертне – пряка. Тосо свахась карми каванямост. Кува наряжи, тувако морыяк:

Киялнэм, ялгинем,

Пиже дуган, парыян,

Вай, пурнамизь, пурнамизь,

Наряжамизь мазыйстэ.

Монь сайсамизь мазый тевс,

Мазый тевга якамо,

Ладясамизь площадь лангс,

Илязан уле визьксчамакс.

Монь чачи сэрем алкине –

Сэрейгавтынк монь сэрем.

Монь чачи лицям ожола –

Мазылгавтынк монь лицям.

Вай, пасиба, пасиба

Мазыйстэ сэрем пурнамозонк.

Свахась, теке одирьва, пурны-сэрни эрзявакс. Ней сон викшнезь панарсо ды човаляв пулайсэ. Кирьгасонзо – мазый тюсонь эрьге керькст. Пильгсэнзэ – раужо кедень кемть. Лавтовганзо каязь викшнезь нардамо.

Лисемстэ свахась озны:

Керень-чочконь Паз - корьминець,

Нолдамак парсте, шумбрасто

Мазый тевга якамо.

Озыть нурдс эли крандазс, туить ардозь, кудавась таго моры:

Кардаз-Сярко, живата,

Кардазонь-чинь Паз - корьминець,

Нолдамака шумбрасто,

Састо молезь, ведькс уезь,

Шожда комолякс кепетезь,

Садовой умарькс певерезь.

Од содамонть кудосо озавтсызь ярсамо-симеме.

Ярсамсто кудатнень (одирьвань кисэ молицятнень) тейтертне «каванить» моросо:

Ярсадо, лелянок,

Ярсадо, роднянок.

Пекенк пештямс ярсадо,

Симемазонк симеде.

Тесэнь сюрось сусексэ,

Тосонь сюрось кескавсо,

Тесэнь салось салдырькссэ,

Тосонь салтнэ сюлмосо,

Тесэнь браганок парьсэ,

Тосонь брагась ведрасо.

Бедной родняс мольтядо,

Вачо родняс мольтядо.

Одирьва мельга молицятне пряст ваднесызь ойсэ. Стряпицятнестэ вейкесь сайсы ойсэ ваднемканть, ды эрьва кудась моли ваксозонзо прянь ваднеме. Истя тееви вейкень кисэ: кудатнень тевест карми молеме, келя, седе парсте-валанясто, теке ой ланга. Тень пингстэ стряпицясь кармавты:

Ойсэ пирят ваднесынек,

Сурсемесэ прят судрясынек.

Оень кондямо чевте седей улезэ,

Сурсемень кондямо валаня кель улезэ.

Кудатнень туемадо икеле од содамось карсемапелензэ полавтсынзе. Те шкастонть свахась кочкарянзо алов путы петак. Те, келя, ламолгавтсы улипаронть. Теде мейле урьвакстыцянть карксасызь кушаксо, конань потс путыть песок марто сюлмо ды ёвтыть истят валт: «Кода песоксто а понави пикс, истя илязо колаво Миколенек берянь сельменень, лихойнень-зрячейнень.»

Кенкшесь панжови. Сови урьвакстыцянть тетязо ды яволявты лишметнень анокчидест.

Весе стить. Кармить лажномо-эряскалеме. Весе капшить туеме. Тесэ тейтертне ды од авинетне морыть одирьва мельга туиця кудатненень:

Вай, Паз чангодть, Паз чангодть,

Юртонь кирдий Юртава,

Иля тандадт шумдонок,

Аволь кеждямга вайгельть

Туемстэ сыргавтынек.

Свахась анокстазь медь марто кедьгенть, ойде пештязь чаконть, лукшонть ды казнетнень путсынзе икельце нурдонтень (крандазонтень). Уредевесь, торосонзо ахолязь, ютасынзе свадьбань ломантнень. Зярс уредевесь тей-тов яки, тейтертне морыть шнамонь, килангов туемань морот:

Азёдо, лелянок,

Азёдо, лелянок.

Таргань уське киява кучтадызь,

Виде порядкава ильтятадызь.

Стядо пазава вальмалга,

Мазы кудотнень юткова.

Весе озыть нурдтнэва (крандазтнэва) ды сыргить одирьва мельга. Гайгить баягат, ракамот-кенярдомат.

Сыргамсто свахась моры:

Кардазонь-чинь Паз - корьминець,

Нолдамизь парсте, шумбрасто:

Састо молезь, ведьга уезь,

Шожда комолякс кепетезь,

Садовой умарькс кеверезь.

Каршо ёндо сасамсто,

Удало ёндо сасамсто,

Коната паро арсезэ,

Се вить ёнов аразо,

Алов сюкпрянзо максозо.

Кона берянь арсицясь,

Се керш бокав аразо,

Апаро мельсэ аштезэ.

Весень ильтямодост мейле аватне одс совить кудонтень. Столь лангс путыть каша чакш, кирвастить штатол ды теить кудораськень кой: сюконить кезэрень пазтнэнень, кудонь кирдиентень, покштятненень-покшаватненень.

Мейле морост алтасызь Норовавантень, Юртонь кирдиентень ды

Нишкепазонтень:

Ох, Верепаз-корьмакай!

Ох, Нишкепаз-сиякай!

Баславамизь, ков пурнынек-сэрнинек,

Ков меленек саинек.

Ох, ине покштят-бабат,

Чачи модасо ойминенк,

Арседе, арседе парыне,

Чарьксчияк тынь максодо.

***

Поладксось сы номерсэ.



ИЗ ВОПРОСОВ К ГЛАВЕ И ПРАВИТЕЛЬСТВУ РЕСПУБЛИКИ МОРДОВИЯ:

ДНИ РОДСТВЕННЫХ ФИННО-УГОРСКИХ НАРОДОВ

ПОЧЕМУ ЭТО ТАК?

ЗАСИЛЬЕ ПОДЛЕЦОВ В КАРЕЛИИ

ПОДПИСКА НА I П/Г 2019 Г.

Чачома чи марто!

«Молоточки»

ФАРИСЕИ*

ПОЛНАЯ БЕССМЫСЛИЦА!

НАЦИОНАЛЬНЫЙ ЯЗЫК, ПРАВО НА СУЩЕСТВОВАНИЕ

КИТЬ МИНЬ?

30 иеть Эстониясо эриця раськетнень Ассоциациянтень

«Мерема» покорила Европу и Азию

НЕТЬ КЕВКСТЕМАТНЕДЕ МЕЙЛЕ...НУЯНЬ ВИДЯЗ

СЁКСЕНЬ КАЗНЕ. ЛЮДМИЛА РЯБОВА

Сурвелень свадьба. Надежда Родионова



главная новости архив номеров ссылки гостевая книга