На главную страницу 
cделать стартовой   в избранное  



Культурно-просветительская газета татарской общины Республики Мордовия

Мордовия - Информационный портал Республики Мордовия - Морис.ру

Мелькужо Эрзянь Мастор - Форум Страна эрзян, эрзянский форум

Голос Эрзи


НЕТЬ КЕВКСТЕМАТНЕДЕ МЕЙЛЕ...НУЯНЬ ВИДЯЗ

ЁВТНЕМА

***

Одушкин Сантяй школанзо прядызе сырнень медаль марто. Вечкевикс предметэнзэ ульнесть эрзянь келесь ды литературась. Сочинениянзо кис «ветеде» аламо тонавтыцязо эзь путне. Снартнизе виензэ стихень аравтнемасояк. Секскак кевкстемась ков молемс тонавтнеме седе тов, эзизе содавтне. Конёвонзо апак кавтолдо кучинзе васол ошонь университетэнь журналистикань факультетс. Курок, стакачинь апак сода чопавтсь студентэнь мелявксто пешксе эрямонтень.

Шкась, кода ведесь лейсэ – оймсема а соды, чуди чинек-венек. А лоткси натой тельняяк. Эзь марявга ютасть, кадовсть удалов семинартнэ, зачётнэ, экзаментнэ, лабораториятне. Ветеце курс, меельце ие, аламо кадовсь, кода кортыть, ёзамс понкстнэнь студентэнь эземтнесэ. Мезеяк а теят: уле ушодкс ды уле пе. Учи, терди, кармавты икелечись!

Нилеце курссто саезь скирдызе Сантяень седеензэ телеотделениясто тейтерь. Оржа вановтозо пачканзо ютакшнось. Чарькодеви, кодат тостонь «одирьватне»: весемеде мазыйть ды седеяк, текенень, пшти кельть. Наратадызь а кенерят «вай!» серьгедеме. Кие, мерема, аволь истямонть сайсы телевиденияс? Ношка келеть марто тон кодамо теле- или радиорепортёр? Кинень эряви истямось?

Вечкема… Вастневсть од ломантне, «вете минутавтомо журналистнэ», кортнесть, мель путсть улемс вейсэ занятиятнесэ, оймсема шкатнестэ, палсемаскак пачколесть иень перть.

Вечкема... Сондензэ сёрмадозь певтеме ламо романт, поэмат, стихть, путозь кинофильмат ды пьесат... Есенин Сергеень нусманя, седеень лажакавтыця валонзо содавикст ламонень:

«Ней вечкемам туртов мон кияк арасян

Лиятань мородо пиштян, ракан, майсян...».

Кадовсь аламо. Ковшка. А марявияк юты шкась. Максыть диплом ды ардт тов, ков кучтадызь, сы явовома шкась. Сави явовомс...

Истя арсезь Сантяй яволявтызе тейтерентень мелензэ – вастовомс ды... а явовомс. Теевемс тензэ никс. Тейтересь талнозь кунсолынзе витькстамонзо. Сеске мезеяк эзь мере. Аволь «варма крандазоль».

- Васня, Сантяй, эрь мольтяно, вастовтано тетянь марто, теевтяно содавиксэкс, Тосо уш...

Шкань апак таргсе, омбоце чинь чикуншкадо мейле, ансяк прядовсть занятияст, Сара, Сантяень вечкемазо, саизе цёранть эстест кудов.

Сарань тетязо, Михаил Борисович Этингер, ведьгемень-кодгемень иесэ, аволь сэрй ломань, вастызе, паряк, икелень содамонзо, паро ёжосо, пеедькшнезь, прок умок учозь инжень. Кайсесть-тейсть сыцятне, ютасть икелев, тосто — пидема-ярсамо нупальс.

Сара кельмонькайстэ эрязасто таргась колбаса, сыр. Керсесь теде-тонадо зяро эряви печтень-печть, путнинзе цяплас, печксесь ашо ды раужо кши. Таго панжизе кельмонькаенть. Сайсь эйстэнзэ кофе тапаркс, прякинеть. Путсь стувор лангс колмо кечинеть. Нолдызе электрочайникенть. Окойники пурнавсть колмонест стувор экшс.

Састыне, аламонь-аламонь, виздезь ярсамсто, Сантяй нурькинестэ ёвтнизе зярдо ды косо чачсь, кить тетязо-авазо, кодамо тев яксевтить, кодамо кудост, зярынест семиясонть.

Ёвтызе, кодамо тема лангс, кода журналист, вечки сёрмадомо. Кортамонть поладызе кудазорось. Черензэ, сельмензэ – Сарань тетянзо - раужот, муёконзо токазь шержейсэ. «Мазый цёрась, неявикс. Сара, маряви, тетякс туссь, мазычинть сонзэ саизе, сэрьскак…», - тешкстызе эськанзо Сантяй.

- Вана тон, Александр, курок кармат якстере диплом марто журналистэкс. Косо кармат важодеме? – велявтсь Михал Борисыч Сантяень ёнов ды пшкадсь сельмезэнзэ ёжовсто ванозь. Теке марто сянгинесэнзэ сайсь сырэнь печкс ды кандызе кургозонзо.

- Паро, путындерясамизь, койсэнь, райгазетань редакторокс. Ансяк седе виде – аравтсамизь кодамояк куронь прявтокс, пароль – культурань, - витькстась Сарань алужозо ды нолдызе талномадонть, теке тейсь кодамояк амазый тев, прянзо.

- А «Комсомолкадо» а арсят? – ювк коштто мейле, валтнэнь башка-башка путнезь, вайгелень апак кепсе кудазорось максь, прок маней чистэ пурьгине, омбоце кевкстема.

Теевсь учомань кашт. Сантяй абунгадсь. Теке пря ланга лоштизь. Эзь сода мезе меремс. «Комсомолка».., онстонзояк эзь сакшно. Окойники сась ёжос, муевсь.

- Косто, кие монь тов сайсамам.., - ёвтызе, мезде арсесь, ансяк, мейле чарькодсь, аволь сень, мезе учость Сарань тетязо ды сонсь Сара. Меремаль весемезэ колмо-ниле валт: «Пароль, кияк лавтов аравтовольгак эли кияк пшкадевельгак». Ансяк, яла мерить, валось аволь нармунь, мекев пулодо а кундасак. Мезе лиссь – лиссь.

- Ну, вант, мон арсекшнынь.., - мельтеме, вановтонь нолдазь, мерсь Михаил Борисович; чамазонзо валгсь сумборя сулейть - мон вана мезде, теде башка, кевкстевлитень: мертяно, карми полыямонь, лиякс, чиявтомань кой, кармить эрявомо, кадык, миллион малава, ярмакт. Улеть сынь тонь?

- Арасть, Михаил Борисович, – чаравтызе прянзо, витькстась цёрась. «Скалонок, Нёкшонь, миемс – те мезеяк арась, петнявкс..,» - кивчкадсь прясонзо.

- Эряви рамамс, тонсь содат, одирьвантень чиявтомань платия. Таго ярмакт, таго ютавтомат. Пель миллион, ловт. Муевить теть? - поладынзе кевкстеманзо Сарань тетязо.

- А-а-а , - киртизе «арасенть» Сантяй, сонензэ марявсь пе а ули «миллионтнэнень»,

- Мертяно, муеви паро ломань. Максы теть пандомга. Таргонь ютазь теть велявтовить?

- Арась, - видьстэ, апак визде ды апак арсе, мерсь, эсь потмова мик машнетезь, Сантяй, - а велявтовить.

- М-да-а, - кувакасто, теке марто, нусманясто лиссь Михаил Борисовичень мештестэ, - кода улемс?

Теевсь општ.

Велявтызе прянзо омбоце бокасонзо озадо аштиця тейтерензэ ёнов, варштась сельмезэнзэ, прок вешсь пельдензэ вал, превть. «Улевель паро полакс Саранень, монень - содамокс. Цёрась мазый, шумбра, ванькс ойме, тевень вечкиця, Сарань валонзо коряс, ды талантов».

Сантяй Этингертнэнь кедьстэ туссь ськамонзо. Сара ильтизе кузтемпес. Кортамот икелень чидест эзть ушолеве. Эскелясь кудов састо, апак капша. Эскелясь, прок уйсь раужо, даволонь ускиця пель. А стакаль чарькодемс, мезе ёвты Сара ванды университетсэ вастовомстот. Шожда ульнесь содамс цёранть оймеёжонзо. Тетянзо кевкстнематнеде мейле…



ИЗ ВОПРОСОВ К ГЛАВЕ И ПРАВИТЕЛЬСТВУ РЕСПУБЛИКИ МОРДОВИЯ:

ДНИ РОДСТВЕННЫХ ФИННО-УГОРСКИХ НАРОДОВ

ПОЧЕМУ ЭТО ТАК?

ЗАСИЛЬЕ ПОДЛЕЦОВ В КАРЕЛИИ

ПОДПИСКА НА I П/Г 2019 Г.

Чачома чи марто!

«Молоточки»

ФАРИСЕИ*

ПОЛНАЯ БЕССМЫСЛИЦА!

НАЦИОНАЛЬНЫЙ ЯЗЫК, ПРАВО НА СУЩЕСТВОВАНИЕ

КИТЬ МИНЬ?

30 иеть Эстониясо эриця раськетнень Ассоциациянтень

«Мерема» покорила Европу и Азию

НЕТЬ КЕВКСТЕМАТНЕДЕ МЕЙЛЕ...НУЯНЬ ВИДЯЗ

СЁКСЕНЬ КАЗНЕ. ЛЮДМИЛА РЯБОВА

Сурвелень свадьба. Надежда Родионова



главная новости архив номеров ссылки гостевая книга