На главную страницу 
cделать стартовой   в избранное  



Культурно-просветительская газета татарской общины Республики Мордовия

Мордовия - Информационный портал Республики Мордовия - Морис.ру

Мелькужо Эрзянь Мастор - Форум Страна эрзян, эрзянский форум

Голос Эрзи


КИТЬ МИНЬ?

Стувтыя уш се шканть, зярдо сынь эрямо Саранскоев. Те ульнесь ниленьгемень иеде теде икеле. Оно мик зяро – ниленьгемень! Эстеньгак а кемеви, зяро иеть ютасть! Те шканть перть ламо ведь чудсь, ламо вармат пувасть. А сёпса, эрьва мезть ульнесть эсень эрямосояк. Кенярксткак, стакачитькак, мелявксткак, ризкст-кажоткак байтяк савсь печтямс. Ёвтнемс теде – кемень книгас а кельгить. Те тевенть кадса седе тов. Течи эсь сёрмадовксом алтаса таго секе кевкстемантень, кона аволь ансяк талновты, кона канды покштояк покш сэредькс моненьгак ды, арсян, тыненкак, вечкевикс ловныцят. Те – минек раськенть сы шкань уцясказо.

Вай, эрзят, ков минь пачкодинек! Овсе отьма чиресэ аштетяно! Каня, а несынк? Каня, а сэреди седеенк тень кувалма? Мекс чатьмонтядо? Мекс баягас а чавтадо?

Мукшновить ломанть, кить неть кевкстематнень каршо ушолить «пельнеме» эйсэнь ды валсо «керямо». Мезть, келя, стяко лабордат? Нолдык телевизорот. Тосо эрзянь (ды мокшоньгак) передачатнесэ ансяк содыть морыть ды киштить. Лисни, эрямонок аволь берянь.

Истямонть истя. Морамо ды киштеме минь тонадынек седе а ков парсте. Монськак морсян «Ламзурь» ансамблясо, содан кавтосядт, а, паряк, седеяк ламо морот. Юткстост седе ламотне, содави, эрзянь. Морамось – тевесь а берянь. Морось ойме вити, седей оймавты, ёжо паролгавты. Кадык ломантне варчнить виест, таргсить вайгелест… Кадоманть кадык. Дык эдь моронть мазычизэ аволь ансяк вайгелень таргсемасо. Моронть питнезэ сень эйсэяк: сон канды ды невти валонть мазычинзэ, тиринь келенть сюпавчинзэ.

Косо те валось?

Марятадо-арась сонзэ мазычинзэ, зярдо кунсолотадо кой-кона морыцятнень? Мон кадык а истя парсте содаса эрзянь келенть, ялатеке арсян, куш кодамо моросо чарькодевлинь эрзянь валтнэнь. Ды эдь арась, истя эрси аволь свал. Сеедьстэ сынь, валтнэ, арасть ды а чарькодевить. Арсетядо, мекс? Секс самай: морыцятне а содасызь келенть ды а бажитькак сонзэ содамс. Весть кевкстия эйстэст вейкенть: «Келень апак сода, кода морсят? Эдь моронь серьгедемстэ эряви аволь ансяк ёвтамс валтнэнь видестэ, эряви чарькодемс моронть смустензэ, ёжонзо, невтемс сень, мезде морави эйсэнзэ».

Кунсолодо, мезе сон мерсь тень каршо. Пек, келя, эрявсь пря тапамс, удемть костямс, лия келень тонавтнезь. Кода лиси, истя лиси. Кие, марят, эйсэнек пек кунсолы?

Истя кортыть аволь ансяк, кода мерить, «рядовой» морыцятне. Пек содавикс ансамблясо морыцятнеяк, кить якить Россиянь регионтнэва ды омбо масторга, сыньгак а бажить моронть вельде невтемс тиринь келенть мазычинзэ. Валтнэнь таркас «цирь-бирь-пичевирь», музыканть таркас – «лакшт-пакшт-брага чакшт». Истямо концертсэ улемстэ кодамо ёжо сайтянзат? Сиземадо башка кодамояк. Секень вант, пря колганоськак таргози «гонги партнень» чавомаст эйстэ.

Мезеяк а мерян, ламот шныть истят морыцятнень. Омбо масторсо кедень келемтезь сынст учить. Тосо тенст седеяк шожда. Морак, мезе понгсь. Ялатеке кияк а чарькоди. Ансяк маштт седе парсте чавомо ды вачкоеме «гонги паренть» ланга. Тосо вечкить истямо культура.

Эсенек ломантнеяк куш мезенть «нильсызь». Радиосо ды телевизорсо «чадозь чады» фольклорось. Тосто, ловт, эрьва чистэ текенть марясак – «тар-лар-самовар» ды «чары-вары косагары». Лия валт а чарькодят. Келя, истя минек покштятне-бабатне икеле морсекшнесть. Валтнэнь таргсесть кувакасто. Секс сынь а чарькодевить. Ды минь кемтяно. Алкукс, паряк, истя?

А кода киштнесть! Кодаткак стриптиз-клубт а эрявить. Ламоксть моненьгак савкшнось неемс неень киштемат. Ацирьгалемам потмозом эзть кельге. Ульнесь-эзь ульне истя, зярдо аватне алгапанарсо лиснесть весень икелев ды, пильге рашконь келемтезь, мельга-мельцек кирнявтнезь, кепе чавсть кияксонть, пиже-ожо вайгельсэ сеерезь? Монень сырькаемгак, авамгак кортыльть лиядо: келя, эрзянь авась кудосояк мирдензэ икельга пельсь ютамс алгапанарсо, аволь тосо ломань юткс лисемс.

Кинень кемемс?

Тень эйстэ берянь, паряк, араськак. Кадык «зэрневтнить» валтомо морост ды лыйнить пулайсэст. Ансяк вана культуранок тень эйстэ сюпалгады-арась – те кадови кевкстемакс. Эрямось а ашти таркасо. Моли. Теке марто аравты од вешемат.

Кезэрень койтнень, а мезть кавтолдомс, ванстомс эрявить. Монськак, таго мерян, лакан те тевсэнть. Ансяк одонтькак а эряви стувтнемс. Косо сон, одось? Косот од моротне? Икеле, ледстяса, ялатеке чачнесть. Композитортнэ, кадык аволь пек сеедьстэ, ялатеке сёрмалесть од морот. Г.Вдовин, Н.Митин, Г.Сураев-Королев, Н.Кошелева. Ней веенст кулость, омбонстнэ, кадык а кежиявтыть лангозом, «ажияст» лия ёнов пурдызь – моронь таркас оперань сёрмадомо верендясть. Те тевесь, эно, эрявикс. Кадык сёрмалить эрьва мезть. Ансяк те «эрьва мезесь» улевель раськенть лезэс. Косо те лезэсь?

Раськенек ков ие яла аламолгады. Ужо, таго ледстясынь неть цифратнень. Сынь аволь ансяк ацирьгавтнить, сынь тандавтнить ды ризнэвтить. Тынсь ванодо. Иестэ иес минек раськесь кири-чуролгады. Невтемга сайсынек, 2002 иень ловоматнестэ «мордватнеде» ульнесть 843 350 ломанть, 2010 иень – кадовсть 744 337 ломанть, лиякс меремс, минек раськесь кирясь 12,9%-с. Ней моли 2018 иесь. Зяро эйстэнек кадовсть, кода арсетядо? Содави, седеяк аламо. Истя тевесь моли Россиянть келес эриця эрзятнень ды мокшотнень марто. Седеяк беряньстэ аштить тевтне эсенек Мордовиясо. Эрзятнеде ды мокшотнеде эсенек республикасо истякак аламольть, ней сындест кадовсть седеяк аламо. Ды те лисни аволь ансяк рузыямонть кувалма. Те лисни сень кувалмаяк: пек ламо од ломанть туить эрямо лия таркав. Ды кадыть васняяк велетнень. А велесь, тынсь содасынк, те – тарка, косо весемеде пек ванстовить минек койтне-кирдатне, тиринь келесь. Сельме икеле чамить-кулыть велетне, сынст марто ёми минек раськенть юрозо. Невтиндерямс цифрасо – сынь кармавтыть авардеме. Ансяк 2016 иестэ минек велетнесэ, кода кортыть, эсест куломасо тусть эрямосто 3985 ломанть, лия таркав эрямо тусть 2 826 ломанть, лиякс мерезь, велень эрицятне ансяк вейке иень перть аламолгадсть 6 811 ломаньс, меельце комсь иетнень перть жо сынь аламолгадсть 150 тёжат ломаньс (ЭМ, от 15 августа 2017 г.).

Сеть велетнесэяк (мон кортан эрзянсетнеде), конат эрить, сеедьстэ а марят тиринь кель. Саемс эсень чачома велем – Кочкурбуень Сурвеленть. Кодак а сан тов – седеем лондады. Эрзякс кортыцятне ансяк сыре ломанть, сетькак эйкакшост, нуцькаст марто снартнить чоледеме рузокс. Мекс? – кевкстнян. Секс самай – седе ламо эрицятнень эйкакшост ды нуцькаст эрить ошсо. Велев сакшныть ансяк каникулань шкасто. Те – вейке тувталось. Омбоцесь, кой-кить снартнить нардамс веленть эйстэ весе эрзянсенть. Те аволь чаво валт. Маринь, ды аволь весть, Сурвелев састь истят ломанть, кить а мерить морамс эрзянь мороткак. Полавтызь се паро коентькак, конань ушодокшнынек ютавтнеме минек земляконть Василий Никифорович Кияевень лезксэнзэ пингстэ: ютавтнинек Кизэнь вастомачи. Ней сонзэ таркас – а чарькодевикс кельсэ озномат ды ансяк рузонь морот. Мерить нолдамс, келя, кавтошка эрзянь морот ды паро. Теяк, келя, саты. Истя моли кезэрень велесэ, конань моданзо лангсо сисемсядт иеть эрясть эрзят, конат Кизэнь вастома чистэ (Троицясто) якасть Пичалов, косо кезэрень шкасто саезь гайгсть эрзянь морот. Ней те арась ды, маряви, зярдояк а велявтови.

Лия велетнеде а карман кортамо. Сынсткак, содан, стардынзе теке ормась. Секс монь свал талновты вейке кевкстемась: «Мекс минь истят лавшотано? Натой эсенек, чачома велесэяк аволь азортано? Мекс косто-бути сазь ломанть менчить-синдтрить ловажанок, кода маштыть?».

Маринь, Мордовиянь та-кодамо велев сась эрямо китаецэнь семия. Кунсолодо седе тов. Сеть китаецтнэ састь, марят, РОНО-в ды вешсть: школасо ветямс китаецэнь келень урокт. Вана тенк кода эряви вечкемс эсь культуранть! А минь эсенекенть эсенек мода лангсо макстано яжамс лия ёндо сазь ломантненень. Кить минь сестэ?

Раиса Щанкина,

Россиянь Журналистэнь союзонь член



ИЗ ВОПРОСОВ К ГЛАВЕ И ПРАВИТЕЛЬСТВУ РЕСПУБЛИКИ МОРДОВИЯ:

ДНИ РОДСТВЕННЫХ ФИННО-УГОРСКИХ НАРОДОВ

ПОЧЕМУ ЭТО ТАК?

ЗАСИЛЬЕ ПОДЛЕЦОВ В КАРЕЛИИ

ПОДПИСКА НА I П/Г 2019 Г.

Чачома чи марто!

«Молоточки»

ФАРИСЕИ*

ПОЛНАЯ БЕССМЫСЛИЦА!

НАЦИОНАЛЬНЫЙ ЯЗЫК, ПРАВО НА СУЩЕСТВОВАНИЕ

КИТЬ МИНЬ?

30 иеть Эстониясо эриця раськетнень Ассоциациянтень

«Мерема» покорила Европу и Азию

НЕТЬ КЕВКСТЕМАТНЕДЕ МЕЙЛЕ...НУЯНЬ ВИДЯЗ

СЁКСЕНЬ КАЗНЕ. ЛЮДМИЛА РЯБОВА

Сурвелень свадьба. Надежда Родионова



главная новости архив номеров ссылки гостевая книга