На главную страницу 
cделать стартовой   в избранное  



Культурно-просветительская газета татарской общины Республики Мордовия

Мордовия - Информационный портал Республики Мордовия - Морис.ру

Мелькужо Эрзянь Мастор - Форум Страна эрзян, эрзянский форум

Голос Эрзи


Арсеман, монь арсеман... Нуянь Видяз

Поладкс. Ушодксось «ЭМ»-нь 508-530-це № №

---------------

Весе кельгить

***

Вирень чувтотнень, куракштнень, тикшетнень ютксо кодат ансяк видт-подвидт арасть. Ожо меште, кувака пильге пичетнень шапкаст пачк бажи седе малавгадомс чипаенть марто тумо. Стака тензэ изнямс велькссэнзэ аштицянть. Ялатеке пря а максы: «Ужодо-ужодо, тынк эйскак пачкоди сыречись, сестэ мон...».

Текеньс мель путыть укшторнэсь, авасоло эйстэнзэ пойнесь. Весемеде ламо, редия, сави пиштемс ламарентень ды пизёлнэтненень. Сынь аволь сэрей-виев чувтотнень эйстэ. Сави цидярдомс. Эсь пряст ливчанясто марить, а сюмордыть алце этажонь эрицятне: овтумарь, верьгизэнь ленте, индерька. Сынь тонадсть эрямонь те этажонтень. Те сынст таркась.

Тикшень масторось ёвтазтнень коряс ламоксть седе сюпав. Мезть тесэ ансяк а вастат! Куконь эрьгетнень марто пеедькшни-элякали куконькась; ашакай тештинеть пурнавсть ловсотикшенть перька;   кецневти сельметь рукшна лопасонзо эльденачкось.

Абунгадат: кодат сынь авейкеть ды кода кельгить, кода маштыть ве таркасо эрямо!

Мекс ломантненень яла аламо. Свал тенст мезе-бути а саты. Свал мезеяк ды нельгевельть, мезеяк ды саевельть. Натой ве кудосо эрямсто кодаяк а явовить ниле ужотне, анокт каявомо вейкест-вейкест лангс. Мастортнэде ледстнемскак а мезть. Текень содыть: ахолить, тандавтнить бомбасост-ракетасост.

 ------------------------

«Кардазане»

***

Те валонть эрзянь валкстнэстэ, зяро ды кода иля вешне, а мусак. Сонзэ ютавтыя-теия рузонь содавикс «двор» валстонть. Сон — юр «дворяне» сюпавонь сословиянь лементень. Дворянтнэнь ютксо ульнесть эрьва кодат: пек сюпавт, сюпавт ды мик «однодворецт».

Сынст эрямонь лувдост, чидест-пародост содатано историянь книгатнестэ ды художествань литературасто. Азоронть кудонь-кардазонь покшолмазо аштесь сюпавчидензэ, зяро ойметь, васняяк, кирдсь кедензэ ало, зяро ломанть валсть ливезь, важодсть лангозонзо.

Сюпав дворянтнэнь велень кудост аштесть кавто, натой колмо этажсто. Кирдсть кудот ошсояк. Седе сеедьстэ, «барской» эрямо кудодонть башка, «кардазсонть» ульнесь лишмень кардо, утомт, мацтт, теплицат, урень эрямо кудо, кухня... Весе те юткось-таркась пирявиль.

Историясь, кода кортыть, тееви-моли спиралень кондя. Эрьва фактось одс тееви омбоксть, колмоксть... ансяк вельть лиякс ды лия парцунсо. Кинь превс совсесь: сы шка, ды умок стувтовозь «дворянтнэ», седе мейле «буржуйтне» сыть прок тоначистэ. А кемевияк — вельмить.

Ютак велева. Ламот васттадызь ды «кецявттадызь»... пирявкссост. Кшнинь. Ламот колмо метрань сэрьсэ. Прок ванстовиця зонасо. Иля снартне, а кирнявтоват вельксканзо. Кудонть мазычинзэяк а несак. Маряви, азортнэ пелить: ят вановтто солы сонзэ мазычизэ таштазь сюпавчист марто. Киде пелить, мезде кекшнить? Пирявкстнэ, латотне... эрьва кодамо тюсонь. Неень шкань «дворянинэсь», кода XIX-це пингень кирдажозояк, мель путы чапомс баня, стявтомс гараж, чувомс лисьма... Кода эно — дворянин!

Кода а ледстямс умонь шкань дворянтнэнь «сёлтонь ормаст»! Вечксть, вечксть сёлтнемс лейть ды лейнеть. Нолдтнесть эйзэст калт. А кадовить эйстэст неенсетнеяк. Ансяк коймень таркас ведень кирдема яндават, эрькеть чувить экскаваторсо. Шабрам маныть уш чувсь келей-кувака домка эрьке. Нолдась калт. Тедедеяк чуваров модасонть сокарясь пандошка экскаватор, чувсь омбоце латко. Омбоце чистэ «пандошкась» урнось уш ветешка кудонь трокс — Ледяень юртсо. Ледяй Киря — цёрась сюпав, оно кодамо кудо «цярадсь»! «Кардазонть» покшолмазо гектар малава. Мезе эйсэнзэ ансяк арась! Ней, маряви, «кирвазсь» ведень-калонь тевсэ.

Кецнемаль: покш, кевстэ ды суликасто мазыйстэ, тевень содазь теезь кудот, перькаст кшнинь, ламо тюсонь пирявкст... Велесь сельме икеле одкстоми, кода а кецнемс! Тёжа иеть эрясь олго ало. Олгонть, сась шка, полавтызе шифер. Окойники кудонь-мезень путомсто ломантне кармасть ютамо нардень а содыця чувтосто кевс, кшнис, суликас, синтетикас...

Ансяк вана...

Мекс-бути те мазычинть ды сюпавчинть лангс ваномсто эцить удемезэнь Некрасов Николаень кода-бути ризкс марто ёвтазь валонзо: «Здесь барство дикое...». Ды кода истят мельтненень а эцемс, зярдо неть прянь шныця кудотнес эзь сова книгась, а гайги эйсэст моро, эзизь нолда вечкеманть. Шкатне ней аволь Некрасовонь. Весе маштыть сёрмадомо-ловномо, малав эрьвань кедьсэ диплом, а «барство дикое» эри неть покш-мазый кудотнесэ моразь.

Арсеман, монь арсеман... Эрямонь кувака киван кува капшазь, кува састо эскелямсто кодат мельть-арсемат ансяк эзимизь содавтне. Прок пшти сёлмо нармунть ливтясть пряудемган. Нусманят, кенярксовт, талновтыцят... Сеедьстэ валгонить превезэнь моданть лангсо покш ды вишкине авидечитнеде арсематне: мекс эрямонь шалтсонть истя ламо кенгелеви, мекс а эряви ломанесь седе ваньксстэ ды седе вемельсэ, апак манче? Янксян: аламо кармавтынь арсеме сёрмадозь книгасон литературань откерень, аламо кармавтынь эрямо превсэ-седейсэ. Янксек-иля, ней уш мезеяк а полавтат.



Чачома чи марто, эрзят!

Подписка на I полугодие 2019 г.

Акция «Штатол» («Свеча»)

После этого «Единый мордовский»?

И снова ложь...

«Раньше я и не знал, что есть книги на эрзянском языке»

«ЭРЗЯНЬ  ПОЭЗИЯСЬ» В МУЗЕЕ

Тихвинская ярмарка

Виктор Живаевень Чачома чистэнзэ 90 иетненень

Арсеман, монь арсеман... Нуянь Видяз

ВИДЬКСТАМО. Людмила Рябова

Сурвелень свадьба. Надежда Родионова



главная новости архив номеров ссылки гостевая книга