На главную страницу 
cделать стартовой   в избранное  



Культурно-просветительская газета татарской общины Республики Мордовия

Мордовия - Информационный портал Республики Мордовия - Морис.ру

Мелькужо Эрзянь Мастор - Форум Страна эрзян, эрзянский форум

Голос Эрзи


ИСТЯТ ЛОМАНТЬ ТУИТЬ МИНЕК ЭЙСТЭ...

2018 иень умарьковонь 18 чистэ тусь эрямосто Мордовия Республикань заслуженной поэтэсь Числав Григорьевич Журавлёв. Сонензэ ульнесть 83 иеть.

Эрзянь поэтэсь чачсь 1935 иень чадыковонь 27 чистэ Самара ёнксонь Похвистнева буень Покш Толкан велесэ. Ветеце классо тонавтнемстэ ушодсь стихень сёрмадомо. Васенце тонавтыцязоль эрзянь поэтэсь В.К.Радаев. Василий Кузьмич ламо вий ды ойме путсь Числавонь сёрмадомань ёрокчинзэ кастомантень. 1950 иестэ Числав кармась тонавтнеме Вишка Толканонь педучилищасо, тесэ таго вастовсь В.К.Радаев марто. Сон тосо ветясь литературань куро. Училищанть прядомадо мейле Числав сонсь тонавтсь эйкакшт. 1954-57 иетнестэ служась армиясо. Мейле 12 иень перть важодсь Магадан ёнкссо стака атлетикань коряс тренерэкс, бортрадистэкс. 1967 иестэ велявтсь Самарав. Важодсь физкультурань тонавтыцякс, тренерэкс, спортонь судьякс. 1975 иестэ прядызе Волгоградонь физической культурань институтонть.

1990-це иестэ Числав Журавлёв ульнесь сеть васенце ломантнень ютксо, конат пурнызь «Масторава» Самара ёнксонь вейсэндявксонть. Зярыя иень перть ветясь эрзянь кельсэ передачат «Радио-7 из Самары» ламо раськень радиосонть. 1996 иестэнть саезь – Россиянь Писателень союзонь член.

Числав Григорьевичень лемензэ парсте содасызь поэзиянь вечкицятне. Стихензэ сеедьстэ лиснить эрзянь журналтнэсэ ды газетатнесэ. Сарансо лисезь стихень ды ёвтнемань зярыя книганзо вастызь пек лембестэ. Шкинемасонзо поэтэсь кепеди эрьва кодат темат, невти эсь шкань кеняркстнэнь ды талноматнень. Сон сёрмады тиринь мастордо, перть-пелькстэнть, вечкемадо, велень эрямодо, эсь раськеденть ды чачома кельденть.

Числав Журавлёвонь произведениянзо кепедить эрзянь ломантнень оймеёжост, кармавтыть ледстнеме эсь ундокстнэде, лездыть чачома келень ды культурань ванстомантень. Поэтэсь свал мельспаросо сакшнось литературань чокшнетнес, раськень кенярксчитнес, раськеютконь эрьва кодат фестивальтнес, конат ютавтовсть Самара ёнкссо, Мордовиясо ды финнэнь-угрань регионтнэсэ, сонсь лездась сынст анокстамонтень ды ютавтомантень.

Числав Григорьевичень васенце произведениянзо лиссть рузонь кельсэ «День поэзии», «Радуга», «Волжские зори» вейсэнь пусмотнесэ. 1982 иестэ «Эрзянь правда» газетасо ды «Сятко» журналсо нолдазель эрзянь стихень васенце пурнавксозо. Сонзэ редизь Мордовиянь сёрмадейтне ды, содави, ловныцятнеяк. Журавлёвонь «Сёксень цецят» поэзиянь васенце книгазо лиссь 1991 иестэ. Теде мейле ульнесть «Овтонь латко» (1993), «Каргонь вайгель» (1995), «Валдо ойме» (1996), «Арсемат ды ёжот» (1999), 2000 иестэ лиссь «Вечкемань теште» I томось, 2001 иестэ – «Кемемань валдо» II томось, 2003 иестэ – «Арсемань пакся» III томось, «Седеень вайгель» (2004), «Каргинеть» (2007), «Kurekesed» («Журавлики», 2010), «Эрямонь юр» (2011), «Кочказь произведеният» (2012), «Свечение слова» (2012), «Солнечное слово» (2017).

Меельце шкасто Числав Журавлёв сёрмадсь валмеревкст, нурька стихть – вишкине произведеният, косо пек домка философиясь кеместэ сюлмавозь психологиянть марто. Истят стихть минек литературасо арасельть. Поэтэсь тейсь васенце эскелькс, ды, мерема, сон лиссь парсте.

1999 иестэ Журавлёв кармась Суоминь М.А.Кастрен лемсэ Раськеютконь Казнень лауреатокс. 2005 иестэ сонензэ максозель Губернаторонь Казнесь эрзянь литературасо шкинеманзо кисэ. 2008 иестэ поэтэнтень максозель Эстононь Малавикс раськетнень ды финнэнь-угрань литературань вейсэндявксонь Программань литературань казнесь «Каргинеть» пусмонть кисэ. 2009 иестэ Числав Журавлёвнень максозель «МР-нь заслуженной поэт» лемесь, казезель МР-нь Госсобраниянть пельде Шнамонь грамотасо. 2012 иестэ Самарань Ояксчинь кудосо ютась сонзэ персональной сайтэнзэ презентациясь, ков пурнавкшность ламо ломанть.

Поэтэсь ламоксть ульнесь эрзянь велетнесэ, косо ломантне свал вастсть эйсэнзэ лембестэ. Перьканзо чарасть кода эйкакштне, истя покш ломантнеяк. Сон эрьванть марто муиль кель-вал, кортыль чевтестэ, седейшкава, прок паро ялга. Сцена лангсто ловныль стихензэ. Казиль книганзо, сёрмадыль паро валт. Журавлёвонь стихензэ лангс сёрмадозь зярыя морот.

Меельце иетнестэ Числав эрясь Московсо цёранзо кедьсэ. Тосо эрямстояк сон сакшныль «Эрзянь вайгель» вейсэндявксонь Эрзянь келень читнес. Калмизь поэтэнть Московсо.

Вячеслав Григорьевич нолдась кеветее книгат. Ды кадык сонзэ арась «Раськеньпоэт» лемезэ, вечкицянзо ды ловныцянзо туртов сон алкукс раськень, покш, эсенек ПОЭТ!

Чевтекс улезэ теть модась, Числав покштяй…

Т.Маторкина,

газета «Эрзянь правда», 22 августа 2018 г.

***

«Эрзянь Мастор» кулялопань теицятне ды ловныцятне, ялгатне, ОО «Эрьмезь» вейсэндявксось явить седейризкс раськензэ-малавиксэнзэ туртов.

***

Мон а содан, зярдо прядса мором,

Ансяк содан-а полавтса кором

Ды а стувтса ТИРИНЬ ЭРЗЯНЬ КЕЛЕМ,

Сырне лангс мон а полавса велем,

Свал тынк ютксо эрямс ули мелем

Валдо ойме раськень эрзянь ломанть.

***

Рунгот копачизь, тиринь Россия,

Верь ды рудаз, ды чопода ве.

Кие истяня нарьгинзеть, кие?

Ки теть анокстась эрямонь пе?

Таго эйкакшот икелев ваныть,

Састо кепедить новолезь пряст,

Таго апаронть стувтыть ды панить —

Учить, кодамо максыть тенст Власть.

Азоркс эстенек эряви улемс,

Кие соки ды солавты сталь,

Саты ульнекшнемс вешицякс, урекс,

Саты мендявозь аштемс, прок каль!

Лакак верьсэнек, сырне ды сия!

Кельме роса, пси прязонок прак.

Ансяк тонеть мон пшкадян, Россия:

— Авай, эйкакшот ванстамо стяк!

***

Бути ломантне а стить,

Ламо ёмить моданть лангсто кить.

***

Ломанесь теке эйкакш кеми:

Сонзэ седеенть а токасы сэме.

-------------------------------------------------

Таго Эрзянь Масторсо седейризксэнь апаро. Умарьковонь 23 чистэ лоткась чавомо седеезэ Мордовиянь ды аволь ансяк, содавикс, чувтосто керсицянть Наумов Александр Алексеевичень.

Наумов А.А. чачсь Игнатбуень Чамза велесэ 1957 иестэ ды весе аволь кувака пингензэ эризе вечкевикс Игнат буесэ. Сонензэ сатотсь эрямосонть а шождыне уцяска. 12 иесэ уставась важодеме кудоютконь, колхозонь, велень тевтнесэ. Ламо важодсь кудонь теицякс-чапицякс. Ютызе Советской армиянть. Кода алкуксонь эрзянь цера стявтсь кудо, конась эсь шкастонзо ульнесь Игнат велесэ сехте мазый, вельтязь эрьва кодамо керьсевкссэ, путсь мазыйдеяк мазый умарьпире, стявсь-кепедсь кавто церат. 1980 иестэ саезь меельце лексемазонзо важодсь эсензэ вечкема тевсэ— чувтосто някань керсемасо. Тенень сон педе пес алтызе эрямонзо.

Эзь кенере седе ламо тонавтнеме, тень лангс апак вано, панжсь эйкакшонь чувтосто керсемань курыне, ветясь сонзэ кеменьшка иеть. Васенцетнеде вейкесь — панжокшнось чувтосто керсемань кооператив. А.А.Наумов ульнесь ламо выставкасо эсь мазычинь теевксэнь невтицякс. Вирь Тавла велесэ, Саран ошсо, Лукояновасо, Болдинасо ды Салехард ошсо. Уцясказо макссь те валдо ойме, превей, мазый эрзянь церантень шкинемань виев тол. Кодамо тевс а кундыль, весе сонзэ лисиль пек вадрясто. Сон варшнинзе виензэ валморонь сёрмадомасояк. Ульнесь свалшкань лездыцякс эрзянь Раськень Озксонь ютавтомантень. Те сон мазылгавтсь Озксонь штатолонть эрзянь кезэрень тешкстнесэ, панжтнесь мазычинь вальмат.

А.А.Наумов эрясь ояксчисэ Вирь Тавла велень чувтосто керсицятнень марто ды мик совась «Эрьмезь» вейсэндявксонтень. Сон путсь ламо вий Йовлань Олонь лемсэ «Этно-кудонь» панжомасояк. Те ине эрзянь церась весе эрямонзо максызе эрзянь культуранть, келенть ды койтнень-кирдатнень ванстомантень-кепедемантень.

***

«Эрзянь Мастор» кулялопань теицятне ды ловныцятне, «Эрьмезь» чувтосто керсицятне, сонзэ тонавтницятне, ялгатне, весе кие вечксь А.А.Наумовонь шкинеманзо, ёвтыть седейризксэст сонзэ эйкакшнэнень, малавикстнэнень эрямостонть тоначив туеманзо кувалма.

Кадык эрзянь масторось карми ялганок туртов чевте ацамокс, прялксокс ды лембе вельтявксокс. Паз, чангодть!

Калаганонь Керяз,

Вирь Тавла, Саран ош

-------------------------------------------

Умарьковонь 14-це чистэ тусь эрямосто содавикс учёноесь, филологиянь докторось, профессорось, МАССР-нь школань заслуженной учителесь, Мордовия Республикань Казнень Лауреатось Бузакова Раиса Николаевна.

Весе эрямонзо перть Раиса Николаевна явсь мель вечкевикс тевентень-наукантень. Сон эрясь валдо эрямо. Вечксь эрямонть, ломантнень, важодемасо ульнесь алкуксонь профессионалокс.

Р.Н.Бузакова чачсь 1931 иень декабрянь 13 чистэ Отяжбуень Ламбаське велесэ. Тонавтнесь Козловкань педагогической училищасо, А.И.Полежаев лемсэ Мордовиянь педагогикань институтсо, МР-нь Правительстванть юрсо экономикань, келень ды литературань НИИ-нь аспирантурасо.

1956-1962-це иетнестэ — Козловкань буень школань инспектор, Орданьбуень Лувне велесэ кавксо иень школасо рузонь келень ды литературань тонавтыця. 1962-1966 иетнестэ – Мордовиянь книгань нолдамонь корректор, художественной литературань редактор. 1969-2002 иетнестэ ульнесь МР-нь Правительстванть юрсо экономикань, келень ды литературань НИИ-нь эрзянь ды мокшонь келень отделэнь наукань покш ветиця сотрудник. 2002 иестэ саезь важодсь Н.П.Огарёв лемсэ МГУ-со.

Раиса Николаевна сёрмадсь малав 100 научной ды научно-методической важодемат, сынст ютксо – эрзянь келень синонимень валкс, ульнесь эрзянь-рузонь валксонь соавторокс ды редакторокс.

Р.Н.Бузаковадо валдо ледстнематне свал кармить эрямо минек седейсэ, сонзэ лемезэ – минек раськенть историясо. Ёвтатано седеймарямонь валт малавиксэнзэ туртов.

Важодемань коряс ялганзо ды тонавтницянзо: Акашкина Р.И., Бибин М.А., Водясова Л.П., Гребнева А.М., Имайкина М.Д., Каторова А.М., Келина А.Н., Кочеваткина О.В., Мишанин Ю.А., Мосин М.В., Таракина Э.Н., Шеянова Т.С., Щемерова В.С., Щанкина В.И., Цыпкайкина В.П., Цыганкин Д.В.

газета «Эрзянь правда»,

22 августа 2018 г.

***

«Эрзянь Мастор» кулялопань теицятне ды ловныцятне явить седейризкс малавиксэнзэ туртов.



ИСТЯТ ЛОМАНТЬ ТУИТЬ МИНЕК ЭЙСТЭ...

ПУТЕВЫЕ ЗАМЕТКИ – 2018

Фаузия Байрамова обратилась в ООН с просьбой защитить языки народов России

Фамилии на «ко»?.. Откуда взялись?

Европейские лингвисты озаботились национальными языками России

Этническая журналистика – основа защиты культуры и языков

БЫЛ ЛИ ХРИСТОС?

УШОДОВСЬ «КУЛЯТ ЭРЗЯКС» ПРОЕКТЭСЬ

День села в Иванцеве!

Монь эрзянь раськем!Эрюш Вежай

Пизёлтнэ таго кенерсть... Николай Ишуткин

АРСЕМАМ, МОНЬ АРСЕМАМ… Нуянь Видяз

Сурвелень свадьба. Надежда Родионова



главная новости архив номеров ссылки гостевая книга