На главную страницу 
cделать стартовой   в избранное  



Культурно-просветительская газета татарской общины Республики Мордовия

Мордовия - Информационный портал Республики Мордовия - Морис.ру

Мелькужо Эрзянь Мастор - Форум Страна эрзян, эрзянский форум

Голос Эрзи


ЭРЗЯНЬ КЕЛЕНЬ КОРЯС ОЛИМПИАДА “ЭРИЙ ВАЛ”

Даволковсто саезь панжиковс «Эрий кель» эрзянь келень оn-line школась (Тольятти ош), Н. П. Огарев лемсэ Мордовской государственной университетэнь финнэнь-угрань культурань научно-исследовательской лабораториясь, “Кор” эрзянь келень кастомань региононь фондось ды зярыя общественной пуромкстнэ ютавтсть весе Россиянь келес эрзянь келень коряс олимпиада “Эрий вал”, конась ульнесь алтазь А. Ф. Юртовонь чачома чинзэ тешкстамонтень.

Олимпиадань теицятне сайнесть мель сыремтемс эйкакштнэнь мелест седе домкасто тонавтнемс эрзянь келенть, кастомс эйкакштнэнь ёрокчист-маштомачист (талантост) эрзянь келенть тонавтнеманть вельде ды седеяк вечкемс тиринь келенть. Секскак олимпиадасонть кармавтоматне ульнесть алтазь эйкакштнэнень 1-це классто саезь 11-с. Мероприятиянь теицятне бажасть аволь ансяк ванномс эйкакштнэнь содамочист, истя жо теемс пакаштненень алкуксонь покшчи.

Кода корты «Эрий кель» школанть ветицязо, эрзянь келень тонавтыцясь, филологиянь наукань кандидатось Ольга Михайловна Богданова (Сусорева): «Те олимпиадась ютавтови омбоцеде. Мелесь сась тенек ютазь иестэ. Мон колмоце ие ветян эрзянь кель skype вельде покштнэнень эсь тонавтомалезксэнь ды программань коряс. Минь ваннотано аволь ансяк эрзянь келень грамматиканзо, истя жо культуранть, историянть. Ламот занятиядо мейле ушодыльть ванномо эсь кудораськень чувтост (родословное дерево). Неть занятиятнесэ минь кортынек эрзянь содавикс ломантнеде, сынст ютксо А. Ф. Юртовгак. Чарькодинек, аволь весе тонавтницятне содасызь сонзэ лементь. Ды вана сонзэ марто седе малавиксэкс теевемга ушодынек ютазь иестэ паро тев – олимпиада, конань алтынек сонензэ».

Олимпиадась аштесь кавто пельксстэ: заочной ды очной. Заочной этапсонть ванновсь эйкакштнэнь ёрокчист эрзякс ильведевкстэме сёрмадомасонть. Весе кармавтоматне явовсть кавто пельксэв: васенцетнень эйстэ ванновсть грамматикань коряс содамочитне, омбоцетне - шкинемань ёрокчинть кастомась (арсемс артовкстнэнь коряс ёвтнема, ютавтомс «Масторавасто» саевкст, сёрмадомс а покш сочинения «Эрзянь келесь – мазый кель»).

Тесэ кармавтоматнень топавтсть малав 500 тонавтыцят. Мордовиянь тонавтницядо башка, заданиятнень тейсть истя жо эйкакштнэ Московсто, Санкт-Петербургсто, Оренбургсто, Иркутскойстэ ды Чувашиясто. Кураторокс лововсть кода тонавтыцятне школатнесэ, истя жо тетятне-аватнеяк. Тесэ жюритне («Эрий кель» эрзянь келень оn-line школань ветицясь О. М. Богданова, Н. П. Огарев лемсэ Мордовской государственной университетэнь финнэнь-угрань культурань научно-исследовательской лабораториянь прявтось, доцентэсь, философиянь наукань кандидатось Е. Н. Ломшина, “Кор” эрзянь келень кастомань региононь фондонь прявтось, эрзянь келень тонавтыцясь, филологиянь наукань кандидатось А. А. Учеваткин, “Чилисема” журналонь прявт редакторось, Мордовиянь заслуженной поэтэсь Н. И. Ишуткин, Россиянь сёрмадыцянь пуромксонть членэсь, эрзянь поэтэсь Д. А. Таганов) ванность топавтозь тевтнень баллтнэнь коряс. Васенце тарканть саемс эрявсь пурнамс 97 саезь 100 баллт, омбоце тарканть саемга – 90 саезь 96 баллт, колмоце таркантень вешевсть 80 саезь 89 баллт. Весе лиянень максневсть участникень сертификатт. Истя жо сюконямо сёрмасо казевсть тонавтыцятне, пакшатнень тетятне-аватне.

Заочной пелькссэнь изницятне варчнизь виест олимпиадань омбоце пелькссэнть, конась явовсь колмо номинацияв:

- видеоматериал;

- урок-вебинар;

- комиссия икеле эсь проектэнть невтемась.

Эряви ёвтамс, истямо лувсо олимпиадань ютавтомась эрзянь келень коряс ульнесь ютавтозь васенцеде. Эрьва эйкакшонтень максневсь олячи – эрьвась кочкась, кодамо номинациясонть ули сонзэ мелезэ невтемс эсь прянть. Весе колмо пелькстнэсэ пакшатненень эрявсь невтемс эсь проектэнть «Эрзянь келесь монь эрямосо». Тесэ ванновсть тонавтницятнень эрзянь кельсэ кортамонь ёрокчист. Весемезэ кармавтоманть топавтсть малав 143 эйкакшт.

«Видеоматериал» пелькссэнть варчнизь виест сеть эйдетне, конат тонавтнить эрзянь келенть кода государственной. Тесэ жюритне вансть эйкакшонть кортавксонзо лангс ды эрзянь литературной келенть тевс нолдамонзо лангс. Изницякс лиссть:

1. Микаева Арина (Тонавтыцясь Чучадеева Наталия Анатольевна).

2. Чучадеев Роман (Тонавтыцясь Чучадеева Наталия Анатольевна).

Колмоце тарканть явизь эсь ютковаст Эль-Астал Айя (Тонавтыцясь Вельдяскина Татьяна Петровна) ды Казабекова Мария (Тонавтыцясь Шемякина Марина Ивановна).

«Урок-вебинарсо» виест варчнизь сеть эйкакштнэ, конат тонавтнить эрзянь келенть кода тиринь. Секскак тесэ жюринь прявтось О.М. Богданова макснесь эйкакштнэнень кевкстемат: кода эрзянь кельсэ кармить улеме ракшатнень, чувтотнень, пангтнэнь, тикшетнень, калтнэнь лемест. Пакшатне пек талность. Ансяк уроконть мейле весень ульнесть паро мелест. Изницякс те номинациясонть лиссть:

1. Наумкина Елена (Тонавтыцясь Юртайкина Светлана Ивановна).

2. Зингаев Алексей (Тонавтыцясь Балкаева Мария Ивановна).

3. Чаткина Татьяна (Тонавтыцясь Косолапова Вера Павловна).

Олимпиадань колмоце пельксэсь ютавтовсь Н. П. Огарев лемсэ Мордовской государственной университетсэ. Теньсэ пек лездась университетэнь финнэнь-угрань культурань научно-исследовательской лабораториянь прявтось, доцентэсь, философиянь наукань кандидатось Е. Н. Ломшина, конась весе виензэ путызе теемс эйкакштнэнень аволь ансяк пелькстамо, истя жо кеняркс. Тень кис пелькстамодо башка пакшатненень теезель культурной программаяк: сынст ветнизь университетэнь историянь музеев ды Национальной культурань институтонь выставочной нупальс. Теде башка эйкакштнэнь икеле морась В. И. Ромашкин лемсэ фольклорной морамокужось.

Эряви меремс, те пелькссэсь ульнесь келейгавтозь ды домкалгавтозь: эйкакштэнень эрявсь невтемс комиссия икеле эсь проектэнть “Эрзянь келесь монь эрямосо”, “Мокшень кялесь монь эряфса”, “Мой герой” (ёвтнемс финнэнь-угрань мифологиясто вечкевикс персонаждо).

Изницякс лиссть:

1. Леонтьева Ариадна (Тонавтыцясь Балкаева Мария Ивановна).

2. Ледяйкина Екатерина (Тонавтыцясь Ромашкина Анна Ильинична).

3. Салаев Дмитрий (Тонавтыцясь Ледяйкина Людмила Анатольевна).

Прявт изницякс, Гран-принь саицясь ульнесь Дубёнкань буень Кочкуровань школань 8-це классо тонавтницясь Наумкин Никита (Тонавтыцясь Наумкина Галина Ивановна). Никита аволь ансяк машты вадрясто сёрмадомо эрзянь кельсэ, вадрясто кортамо эрякс, истя жо сон зярыя иень перть сёрмали ёвтнемат ды пьесат. Эряви меремс, пьесань сёрмадыцятнеде эрзянь кельсэ одтнэнь ютксо пек аламо. Секскак жюрись апак кавтолдо максызе тензэ изницянь тарканть.

Весе изницятненень ды сынст тонавтыцяст туртов «Кор» эрзянь келень кастомань фондось, кона ульнесь олимпиадань социальной партнерокс, казсь ярмаконь казнеть, книгат ды Эрзянь келенть пельде пшкадема. Истя жо эсь книгаст изницятненень казизь содавикс эрзянь поэттнэ ды сёрмадыцятне: Николай Ишуткин, Маризь Кемаль, Тамара Баргова, Людмила Рябова, Алина Подгорнова. Мокшонь ды эрзянь раськень общественной пуромксонь исполкомось истя жо лездась книгасо.

Олимпиадань меельцепелев «Эрий кель» эрзянь келень оn-line школань ветицясь О. М. Богданова ёвтась сюконямот весе пурнавозтнень туртов ды ёвтнизе эйкакштнэнень, кодат ильведевкст седе сеедьстэ тейнесть сынь олимпиадань кармавтомань топавтомсто: што ды штобу союзтнэнь тевс нолдтнемась, зярдо эрзянь кезэрень кельсэ неть соютнэ арасельть. Истя жо О. М. Богданова ёвтнесь тонавтницятненень эрзянь келень коряс эсь тонавтнема лувдо (план самообразования по эрзянскому языку). Эрьва пакшась эсь олясонзо седе домкасто содаволь эрзянь келенть ды литературанть. Те тонавтнема лувось ашти зярыя пельксстэ (модульстэ):

1. Эрзянь кельсэ художественной произведениянь (фольклорной произведениянь) ловномась.

2. Эрзянь кельстэ рузокс текстэнь ютавтомась.

3. Кезэрень эрзянь валтнэнь тонавтнемась.

4. Научно-исследовательской проект.

5. Эрзянь кельсэ эсь текстэнь сёрмадомась ды лият.

Олимпиадань весе пелькстнэнь ютавтомсто эйкакштнэнь цитнесть сельмест ды кецнесть седеест. Улезэ истямо олимпиада сы иестэяк. Пазчангодть!

«Эрий кель» эрзянь келень оn-line школась



Подписка - 2018

МЕКС, ЭРЗЯ, А ВЕЧКСАК ЭСЬ «ЭРЗЯНЬ МАСТОР» ГАЗЕТАТ?

ЭРЗЯ, ЗА ЧТО НЕ ЛЮБИШЬ СВОЮ ГАЗЕТУ "ЭРЗЯНЬ МАСТОР"?

План работы правления Мордовского республиканского общественного Фонда спасения эрзянского языка на 2018-2019 гг.

БИБЛИЯ СПАСЁТ ЭРЗЯНСКИЙ ЯЗЫК?

- Интернет-подборка

ЭРЗЯНЬ КЕЛЕНЬ КОРЯС ОЛИМПИАДА “ЭРИЙ ВАЛ”

В УЛЬЯНОВСКЕ В ПЯТЫЙ РАЗ ПРОШЕЛ ПРАЗДНИК «ШУМБРАТ»

10 лет Эрзянской Википедии!

Нуянь Видязонь тешкст

Мокшонь культурань шитне Эстониясо

«Древо жизни».

ТОН ВАКСОН. Алёна Маторкина

Эрзянь келень читне Кочкуронь буесэ

Япононь ялганок Наоки Ватанабе кучи тенек лембе валт

АРСЕМАМ, МОНЬ АРСЕМАМ… Нуянь Видяз



главная новости архив номеров ссылки гостевая книга