На главную страницу 
cделать стартовой   в избранное  



Культурно-просветительская газета татарской общины Республики Мордовия

Мордовия - Информационный портал Республики Мордовия - Морис.ру

Мелькужо Эрзянь Мастор - Форум Страна эрзян, эрзянский форум

Голос Эрзи


ЭРЗЯНЬ КЕЛЕНЬ ЧИСЬ ОСЬКИНАСО

Ульяновская обл.

-----------------------------------

Ульяновск ёнксонь Инзабуесэ зярыя эрзянь велеть: Поддубное, Черёмушки, Челдаево, Оськина. Меельцесэнть чадыковонь 19-це чистэ велень школасо васенцеде ютась кенярксчи – Эрзянь келень чи. Школань актовой залось пешксель ваныцядо. Тердевсть ламо инжеть, арсевсь сюпав программа. Покш экрансо невтевсь эрзянь учёноенть Анатолий Павлович Рябовонь фотографиязо.

Оськинань библиотекань важодицясь Е.Ф.Храброва анокстась пародояк паро выставка, косо невтсь эрзянь кельсэ лисиця литературанть. Неявикс таркасо – МР-нь Народной писателенть И.А.Калинкинэнь фотографиязо ды книганзо. Сон чачсь те райононь Чей велесэ.

Кирвазтезель Раськень штатолось. Эряви меремс, Эрзянь келень чинть ветясть тиринь кельсэ. Покшчинь ветицятне ёвтнесть, зярдо кармасть тешкстамо Эрзянь келень чинть. Ламот васенцеде марясть сондензэ, а содыльть, те чинть тешкстыть Россиянь ламо регионсо. А.П.Рябовдо доклад анокстась 10-це классонь тонавтницясь Юлия Керова. Авадо валморо ловнось Максим Косов.

Вал сайнесь Инзабуень райононь прявтось В.Н.Шкунов:

– Оськинасо ванстыть тиринь келенть, койтнень-кирдатнень, культуранть. Сонзэ эрицятне паро невтевкс лиятнень туртов. Сынь – эрямонь вечкицят, ламос бажицят, тевень педе-пев топавтыцят. Аштетяно каштанчисэ сень кувалма, зяро ёроков ломанть чачсть эрзятнень ютксо.

Сонзэ валонзо поладынзе Инзабуень администрациянь прявтось А.И.Макаров. Сон тешкстызе, сынст модатнень лангсо эриця раськетне свал эрясть покш ялгаксчисэ ды зярдояк ютксост эзть лисне сёвномат, зыянов тевть. Александр Ивановичень нинзэ весе малавикстнэ – эрзят. «Мон пек вечкса те раськенть», – видькстась А.И.Макаров.

Инжетнень пельде лембе валтнэнь ютксо ульнесть концертэнь номерт. Сынст анокстынзе «Лейне» эйкакшонь фольклоронь коллективесь. Школанть юрсо ансамблясь пурназель 1990 иестэ. Ламо иень перть сонзэ ветясь В.П.Кукушкина. 1999 иестэ саезь – А.А.Смолкина. Сон прядызе М.Е.Евсевьев лемсэ МГПИ-нть, тонавтнесь «Музыкальное образование» специальностенть коряс. Альбина Александровна полавтызе коллективень составонть. Тосо ушодсть морсеме начальной классо тонавтницятнеяк. Ней тесэ мельспаросо морсить кемень эйкакшт. Улить мазый оршамопелест. Вишка артисттнэ невтнить эсь пряст аволь ансяк Оськинань школасо, сынь морсить райононь, ёнксонь покшчитнесэ, якить пелькстамо. Саемга, мелят «Лейнесь» морась Павловской районсо «Поволжская глубинка» раськень культурань Весероссиянь V-це фестивальсэ, Барыш ошсо «Малиновый звон» фестивальсэнть-конкурссонть, Жадовка посёлкасо «Зажги свою звезду» регионъютконь фестивальсэнть. Те иень даволковонь 25-це чистэ Карсун посёлкасо коллективесь таго идизе «народной» лементь. Теке жо чистэнть ютась народной хортнэнь Весероссиянь конкурсонь I-це этапось (регионъютконь). «Лейнесь» кармась I-це степенень лауреатокс. Маласо шкасто ансамблясь сырги морамо Нижний Новгородов. Нама, неть изнявкстнэнь кис эряви ламо важодемс. Те сеске неяви, зярдо ванат ансамблянть лангс, кунсолат морамост. А содан, ули-арась минек республикасо эйкакшонь истямо коллектив, маряви, арась. А.А.Смолкина яви покш мель те ансамблянтень. Недлязонзо кавксть-колмоксть ютыть репетицият, сынь молить аволь ланга-прява. Зярс видестэ а морасыть гайттнень – сон а нолдатанзат. Секскак кунсолыцятнень талновты эйкакштнень морамось, сынь морыть эрзянь кезэрень моротнень ламо вайгельсэ. Ризнэвти, аволь эрьва школасо ули истямо тонавтыця, кода Альбина Александровна.

Паро валт истя жо ёвтасть Ульяновск ёнксонь областень эрзянь ды мокшонь национально-культурной автономиянь прявтось В.А.Софонов, Инзабуесэ те автономиянь райононь отделениянь ветицясь И.В.Смолкин, Оськина велень куншка школань прявтось Ю.М.Вишняков (самай сон арсизе-пурнызе те покшчинть), Эрзянь ды мокшонь раськень Регионъютконь общественной вейсэндявксонь исполкомонь секретаресь О.В.Дулкин. Вал сайнесь музыкантось Андрей Ромашкин. Сон ёвтась сюкпрянь валт «Лейне» ансамблянтень ды сонзэ ветицянтень. Шнызе морамост, минек культурантень мелень явоманть. Пачтясь седе, ков ардтнесь «Торама» фольклорной ансамблясь, кода сынь кунсолость сырькайтнень морамост, тонавтнесть пельдест.

Теде мейле кенярксчись поладовсь велень Культурань кудосо, косо «Морденс» фолк-группась невтсь концерт.

Т.МАТОРКИНА

Фотось авторонть.

Газета «Эрзянь правда»,

25.04.2018 иень 16 №.



Панжиковсто Чачома чист тешкстыть:

Подписка 2018 - II полугодие

Эрзянь келень идема Фондонь ОД ВЕТЯМКУРО

ЙОВЛАНЬ ОЛО - ТЫ БУДЕШЬ ВСЕГДА В НАШИХ СЕРДЦАХ!

Коренные народы возмущены!

ЗААРКАНЕННАЯ НАУКА

ЧТО ОБЩЕГО МЕЖДУ ЛАТВИЕЙ И МОРДОВИЕЙ?

ЭРЗЯНЬ КЕЛЕНЬ ЧИСЬ ОСЬКИНАСО

ДЕНЬ ЯЗЫКА И СМЕНА ПОКОЛЕНИЙ

25 ЛЕТ ТРАДИЦИЯМ

ЭРЗЯНЬ ИНЕКУЖОНЬ ПРЕВКУРОНЬ МЕЛЬКЕМЕКСТАМОСЬ

СВАЛ ГАЙГЕЗЭ ТИРИНЬ КЕЛЕСЬ!

Колмо шляпат. Дригань Толай

АРСЕМАМ, МОНЬ АРСЕМАМ… Нуянь Видяз

Мон аволь тонь... Эрюш Вежай



главная новости архив номеров ссылки гостевая книга