На главную страницу 
cделать стартовой   в избранное  



Культурно-просветительская газета татарской общины Республики Мордовия

Мордовия - Информационный портал Республики Мордовия - Морис.ру

Мелькужо Эрзянь Мастор - Форум Страна эрзян, эрзянский форум

Голос Эрзи


ТЕСТЭ А САЙСАК, ТЕЗЭНЬ А ПУТСАК...Эрюш Вежай

Неень шкань эрзянь ёвкске

***********************

1960-це иетнень ушодкс. «Куйбышев-Серьгиевск» таштыне, ансяк вете вагонсо, поездэсь арды, капши Серьгоскоев. Теке кувака понав сукс шашты поездэсь масторонть элева. Вирь колкатнень юткова, паксятнень келева. Кизэнь ушодкс. Раужо пеке паровозось, виензэ пурназь, пухаи качамосонзо поездэнть прясо. Шкань-шкань сон паразевкшны теке покш, раужо бука: - У-ооов! У-ук! У-ууук! Чаротне стукить рельсатнень сезевкстнэсэ: - Дык-дык! Дык-дык! Дык-дык!

Вагонось таштыне. Витнезь ламодо ламоксть. Потмозо артозь ламоксть. Аволь пек парсте. Артомапелесь петнявкксо чудесь ды коськсь лушминесэ-латкинесэ.

Вагонсонть ломантнеде аволь ламо. Седе ламотне те шкантень лисекшнесть лия станциятнева. Кадовсть ансяк сетне, конатне лисить меельце лоткамо таркатнесэ – Сухадолсо ды Серьгоскойсэ. Кавто сыре авинеть, меремс, сырявинеть, весе ардомашканть ютавтызь кортнемасо, кулянь ёвтнемасо. Вейкесь эри Адлякувасо. Омбоцесь – Захарка велень. Кие кулось, кие сэреди… Кие урьвакстсь, кие мирдес лиссь… Кие чачтась, кие явсь… Весе содавикстнэ ледстязь, весе кулятне пачтязь…

Вейкесь арды Самарасто. Содавтызе тосо эриця тейтерензэ. Омбоцесь арды Безыменкасто. Якась тов микшнеме атянзо марто медь ды модамарть.

Пачкодсь кортамось вейке аваломанденть. Тона лиссь аволь умок мирденень, эйкакш марто цёрань экшс. Эрить, келя, а беряньстэ. Вадрясто. Авась парсте яки мирдензэ мельга, парсте ванны аволь эсензэ эйкакшонть мельга. Ансяк... велесэнть мезеськак васов а кекшеви. Ломантне неить: келя, ялатеке, аволь пек чевтестэ кортни од авась эйкакшонть марто, казямостояк тензэ шкань-шкань серьгели. Сырькайтне теде кортнить апак сялдо, апак згиля. Сынь мелявтыть аванть кискак, эйкакшонть кискак. Парсте чарькодить, кода а шожда тонадомс авантеньгак аволь эсензэ эйкакшонтень, кода а шожда эйкакшонтеньгак тонадомс од авантень… Эрямось истямо. Сонзэ эрямс – аволь паксянть трокст печтямс.

Вейке сырявась стакасто укстась, варштась вальмаванть неявиця, моданть чирес ландиця чипаенть лангс ды правтсь: - «Нама, а шожда од авантень. Тестэ а сайсак, тезэнь а путсак»… Ды истя меремстэ невтсь кедь лапушкасонзэ васня пекензэ лангс, мейле седей пенчензэ алов….

Вагонтнэ соркстасть. Паровозось кармась тормозтямо. Сыряватне кармасть пурнамо курмост-кармост. Курок лисема….

*******************

Монь эрзянь раськем!

***

Кодат мазыйть эрзянь од ломантне,

Кодат сельмс каявицят чамаст,

Ванькс Инечинь алнэть — эрзянь од аватне,

Цёратне – сэрейть ды ёлганят.

Авась юты – сельметь а саевить,

Цёранть лангс ванат – а вановат,

Эрзянь ломань, Нишкепазонь теевть,

Тон мазычинть чачосот кандтнят.

Оршни авась – сон Инязорава!

Сэрни цёрась – неят Инязор!

Секс раськенек толсо эзь пултаво,

Истятано минь! Те – эрзянь кеме кор!

Ванькс Инечинь алнэть эрзянь од аватне,

Цёратне виевть, серейть, вадрят…

Касост сынст кондямокс, превеекс эйкакштнэ,

Виемть, раськем, инеськеть, эряк!!!

************************

А кунды эрзянь тевтнес се…

***

А кепедеви се, кие кулось,

А кунды эрзянь тевтнес се,

Кинь оймезэ полавтовсь.

А кеми эрзянь раськес се,

Кинь превсэнзэ кадовсь ансякось се,

Мезесь ве ёндо эзэнзэ «чукавтозь».

Превстэнзэ васня панизь Нишкепазонть,

Мейле – эсь раськеденть содамонть,

Седе мейле лемензэяк салызь,

Эрзятнень пряс копачизь «мордвиямонть».

Васня полавтови келесь, мейле – мелесь,

Ломанесь сонсь мик, апак редя,

Карми кемеме шабрань мельс,

Эри, эсь мельтнес апак неждя.

Истя эрятнестэ теевсь «ревесь»…

Тееви эрьва чистэ - уресь…

Эрзят, илядо уле «ревекс»,

Уледе, васняяк, ломанекс…



Подписка 2018 - II полугодие

ЧАДЫКОВОНЬ 16-ЦЕ ЧИСТЭ ЭРЗЯНЬ КЕЛЕНЬ ЧИ!

ОГЛАСКА СПАСЛА ЯЗЫК?

ЭРЗЯТ, ВАНСТЫНК ЭСЬ КЕЛЕНК! Раиса ПЛОТНИКОВА

В Марий Эл учитель объявил голодовку

Эрзянь келень Чи

В Киеве создали «Свободный Идель-Урал»

РОССИЙСКИЙ ПАТРИОТИЗМ КАКОВ ОН НА САМОМ ДЕЛЕ?

Ванстомс «Сятконть»!

ЭРЗЯНСКИЙ ЯЗЫК В ОПАСНОСТИ

Учитель эрзянского—жертва порочной системы

Из «Гостевой книги «ЭМ»

Нуянь Видязонь тешкст

Изнямо марто, Алина!

Мекс монь авам – «мама».... Числав Журавлёв

ТЕСТЭ А САЙСАК, ТЕЗЭНЬ А ПУТСАК...Эрюш Вежай

ДЕНЬ ЭРЗЯНСКОГО ЯЗЫКА. ЭРЗЯНЬ МОРОСЬ СЕДЕЙ ВАНСТЫ

АРСЕМАМ, МОНЬ АРСЕМАМ…Нуянь Видяз



главная новости архив номеров ссылки гостевая книга