На главную страницу 
cделать стартовой   в избранное  



Культурно-просветительская газета татарской общины Республики Мордовия

Мордовия - Информационный портал Республики Мордовия - Морис.ру

Мелькужо Эрзянь Мастор - Форум Страна эрзян, эрзянский форум

Голос Эрзи


Арсемам, монь арсемам… Нуянь Видяз

Поладкс. Ушодксось «ЭМ»-нь 508-511-це № №

---

КОДА-МЕЗЕ МЕРЕВЛИНЬ «ЧАНСТЬ» ВАЛДОНТЬ

Мон пе а неян кортамотненень, мезе те истямось, чанстесь. Кодамокс сонзэ ансяк а невтить, ансяк кодамо питне тензэ а макснить! Виде, а шожда лангс таргамс те чартьчинть, теемс «неявицякс» сонзэ ламонень. Монь койсэ, весемеде виде тешксэкс тензэ,эрзякс чарькодезь, карми, ды аволь ансяк карми, ули «уця» валось. Кузьма Григорьевич Абрамовонь коряс (2002 и.) – «те кутьмерень верце пельксэсь, косо ашти сявдиксэсь». Чевтестэ ёвтазь. Ансяк вана кода-бути аволь пек чарькодевикстэ. Эрзянь-рузонь валкссонть, кона печатазель 1949 и., панжови те валонть смустезэ истя: 1) анат. хребет, позвоночник; 2) горб. «Горбонть», кавтолдомань апак сода, шаштсынек веёнов. Кадовить «хребет» ды «позвоночник». Васенцесь синоним омбоцентень. Секскак лиси: уця – каряз, каряз ловажа, позвоночник. Седе тов валт сравтнемс а мезть, малав эрьвась соды, кодамо питнечизэ ломаненть эрямосо уця рунгопельксэнть, кодамо карми эрямозо, томбавиндеряй.

Эйкакшпингстэ, ламо иеть те шкадонть мейлеяк, марявсь тень, Модамасторонть лангсо весемеде уцяскавт сёрмадейтне: Пушкин, Лермонтов, Кулдуркаев ды аволь аламо лиятне. Содамочинь гайтть, вечкема ды морякс увныця цяпамот ловныцяст пельде! Кинь кельпрясто а сезневить лемтне, таго ледстясынь, Пушкин, Лермонтов, Кулдуркаев, Лев Толстой…Инжекскак сестэ превзэнь эзть валгоне мельтне: кодамо калгодо, стака канст савсь тенст кандомс. Марямга ёвтазь видечинь валонть кис пансемат Кавказга-кува, тюрьмат… Кулдуркаев эйсэст аштесь кемгавксово иеть. Варчнизь тосо аштеманть «ламбамо» танстензэ эрьва кода. Сервантес, Чесноков, Гюго, Короленко... Стака эрьва ёндо: трононь вечкицятне норовасть ды норовить седе сэредькстэ сускомс, лепштямс, седе «алсетне» - насмодемс кодамояк комолянь сталмо ды пек сэпей валсо.

Те чансть?

Кадови куломазон Есенинэнь Константинова велесэ Анна Снегинань (Кашинань) кудосо улемам. Суликасо вельтязь келей полка. Эйсэнзэ эрьва кодат документ. Ве таркасонть, суликанть ало, эрьва кодамо покшолмань фотокувот. Есенинэнь нинзэ. Ванномстост аватне ургатемсть чошнозь сялдомонзо. «А, ветексть урьвакстнесь! Те мезе истя!? Ков маштови!? Сонсь вечкемадо сёрмадсь…».

Сыненст эзь чарькодеве: куш кемексть, куш сядоксть урьвакст, истямо морыця, домка седейс, кодамоль поэтэнть, а эртеват, те седеенть кондямо авань седей а муят. Келеель юткось Есенинэнь ды неть вете аватнень ютксо. Секс Сергейнень стакаль, пек стакаль эскелямс-изнямс те ютконть. Талант, ды седеяк покш талант, – те аволь ансяк уцяска, покш майсемаяк.

---

Поладксось сы номерсэ.



Од ие марто, мельвановикс ловныцят!

Подписка на 1-е полугодие 2018 г.

Эрзя года - 2017

Сказ про то, как Меркушкин Кремлю служит

Улыбочку!

ЧЕТВЕРТЬ ВЕКА МУЗЕЮ

«История и культура древних удмуртов»

Культурная столица 2019 года

В собственном соку или уникальный опыт «поддержки» национальной культуры в РМ

ШУМБРАТ, ОД ИЕ!

ЭРЯСКИНЭНЬ ЭРЯМОСТО. Мацьказонь Лёфай

Литовантень – 20 иеть

Сёрма Дригань Толайнень

Арсемам, монь арсемам… Нуянь Видяз

Явдано седейризкс!



главная новости архив номеров ссылки гостевая книга