На главную страницу 
cделать стартовой   в избранное  



Культурно-просветительская газета татарской общины Республики Мордовия

Мордовия - Информационный портал Республики Мордовия - Морис.ру

Мелькужо Эрзянь Мастор - Форум Страна эрзян, эрзянский форум

Голос Эрзи


ТЕ ОПЕРАСЬ КАРМИ АЛКУКСОНЬ КАЗНЕКС

Михаил Николаевич Фомин — Россиянь Композиторонь союзонь член, МР-нь Государственной премиянь лауреатт. Сонзэ содасызь Мордовиясо весе театралтнэ ды культурань вечкицятне. Композиторонть творчествань стажозо 35 иеде ламо.

Чачсь-кассь Михаил Николаевич Орданьбуень Вихляевка рузонь велесэ. Эйкакшпорасто саезь бажась невтемс прянзо сцена лангсо, морсесь школань весе мероприятиятнесэ, кудосо кунсолось сестэнь содавикс морыцятнень пластинкатнень. Школань прядомадо мейле сась тонавтнеме Саран ошонь Л.П.Кирюков лемсэ музыкань училищав ды 1972 иестэ саезь кармась морсеме Саран ошонь опереттань театрань хорсо. Шкань ютазь артистэсь тусь тонавтнеме дирижёрокс Казань ошонь государственной консерваторияв. Вейксэ иень ютазь, теке консерваториясонть Фомин прядсь курсат, кода композитор, музыковед ды теориянь дисциплинань преподаватель.

1980 иестэ сон мекев велявтсь Казань ошсто Саранов ды поладызе важодеманзо «Умарина» моронь ды киштемань ансамблясонть хормейстерэкс, мейле тонавтсь студентт М.Е.Евсевьев лемсэ МГПИ-нь музыкань факультетсэ. Зярыя иеть Михаил Николаевич важодсь МР-нь Культурань министерствасо, васняяк искусствань отделэнь прявтокс, мейле – культурань министрань полавтыцякс. Сестэ самай Мордовиясо панжозельть Эрзя-мокшонь раськень театрась, Хореографиянь школась, Камерной хорось. Ялатеке театрась эйсэнзэ эзь нолда ды 1991 иестэ Фомин ладязель опереттань театрань прявтокс. Те театрась сонзэ вийсэ иень ютазь лемдязель музыкань театракс. Прявтось теизе весементь, штобу 1994 иестэ максомс тензэ эрзянь содавикс морыцянть И.М. Яушевень лемензэ.

Сеть шкатнестэ ды седе товгак Михаил Николаевич эзь стувтне эсензэ творчествадояк, сон сёрмадсь ламо эрьва кодат произведеният эрьва кодамо жанрасо. Фомин – зярыя романсонь ды моронь автор, сон сёрмады эйсэст минек республикань содавикс поэттнэнь стихест лангс, сеедьстэ морси эйсэст сонсь. Сонзэ произведениянзо вечксызь И.М.Яушев лемсэ театрань солисттнэяк. Михаил Николаевич эрямонзо перть невтизе прянзо аволь ансяк кода композитор, истя жо дирижёр-постановщик, сон вечки вастневеме эйкакштнень марто школасо, ютавтни ламо творческой чокшнеть-вастовомат ды овсе а бажи оймсеме. Михаил Николаевич эсь произведениятнес бажи совавтомс эрзянь раськень фольклоронь элементтнэнь, теде корты «Сияжар» сонзэ васенце покш операзо, конань авторось сёрмадызе 1993 иестэ эрзянь поэтэнть В.К.Радаевень поэманзо коряс. Операнть премьерась ульнесь 1995 иестэ ды кармась редявикс событиякс республикань культурань эрямосонть. Эряви тешкстамс, те ульнесь васенце опера, кона сёрмадозель эрзянь кельсэ. Ламо иень перть «Сияжарось» мольсь музыкань театрасо, невтевсь Мордовиянь телевидениясо ды натой якась гастролев Вологда ошов. 1998 иестэ оперань авторонтень ды прявт рольтнень налксицятненень С.Эскиннэнь ды М.Максимованень максозель Мордовия Республикань Государственной премия.

Омбоце операзо – «Патриарх Никон», конань композиторось сёрмадызе 2003 иестэ, истя жо эзь кадово мельтеме. 2012 иестэ сон, кода концерт, моразель ды тешкстазель Равчирень ды Урал ёнксонь композиторонь музыкань 25-це Фестивальсэ.

Весе оператнень лангсо авторось важодсь 8-10 иеть. Малав кемень иеть сон важодсь «Легенда древности» операнть лангсо. Сон сермадозель В.К.Радаевень «Сурай» книганзо коряс. Те уш омбоце произведения (васенцесь – «Сияжарось»), конантень композиторось мельспаросо совавтсь национально-музыкальной интонацият ды сынст обработкат. Михаил Николаевич а сёпи, важодемась мольсь пек стакасто. Оперась арсезель 1993 иестэ. Шкась таргавсь зярыя иес. Либреттонть сёрмадомо арсекшнесь содавикс режиссерось В.В. Долгов, ансяк а шкастонзо тусь эрямостонть. Мейле М.Н. Фоминнэнь либреттонть сермадомсто пек лездасть РФ-нь ды МАССР-нь культурань заслуженной роботникесь, искусствоведэсь В.С.Брыжинский ды эрзянь сермадыцясь Л.П.Седойкин. Вейсэнь вийсэ либреттось аноколь ды мелят оперась прядозель. Ней Михаил Николаевичень седеесь сэреди-талны лия мелявксонь коряс – кода путомс те покш произведениянть театрасо, конась, алкукскак, улевель бу покш казнекс Мордовиянь театрань вечкицятненень ды инжетненень. Кода корты композиторось, сонзэ операсонть арась политика, те лирической драма эсь тиринь мастордонть, алкуксонь вечкемадо, што вечкемась зярдояк а изняви кежентенть эйзэнзэ совавтозь ламо кезэрень эрзянь койть-кирдат: озномань, кенярксчинь, тундонь вастомань сценат. Койтнень-кирдатнень сценатнень сермадомсто авторось ламо мезе кармась содамо историянь наукань докторонть, мокшэрзянь этнографиянь содыцянть Н.Ф.Мокшинэнь пельде.

Мезде те произведениясь? Тевесь моли Пурня велесэ. Тосонь эрицятне ламо иеть пелить тандавксто, конань чачонть потс кекшни Идемевсесь. Сон чавны Пурнянь эрицятнень ды кодаяк киненьгак а изняви. Эри те велесэнть Сурай од цёрась. Сонзэ тетянзо-аванзо истя жо чавинзе те Идемевсесь. Куломсто Сураень тетясь Пичай энялдсь цёранстэнь идемс веленть те тандавкстонть. Теке жо велесэнть эрить кавто патят-сазорт: Вия ды Ная. Наянь обуцязо аволь пек паро, секскак мазый тейтеренть кияк а бажи саемс никс. Вия жо пек вечкеви велень цёратненень чевте седеензэ кувалма, ансяк покш патясь а мери тензэ лисемс мирденень сондензэ икеле. Весть Вия мольсь вирев, ды тосо лангозонзо каявсь покш овто. Аволь васоло яксиця Сурай идизе тейтеренть идем ракшадонть, ды мазый Вия полонизе цёранть седеензэ. Те шкане Идемевсесь весе вийсэнзэ бажи манямс Наянь эстензэ, тонась жо кодаяк а максы прянзо. Вия марто Сурайть кармить вечкеме вейкест-вейкест, ансяк Ная а мери сазоронтень коламс кезэрень коенть ды лисемс мирденень васенцекс. Сурай сы Наянень энялдомо, ансяк Наянь кежей обуцясь моли каршо. Апаро тейтересь снартни манямс Сураень эстензэ. Ансяк вечкиця цёрась киньгак а неи ды а мари Виядо башка. Сестэ Ная арси чавомс вечкицятнень ды энялды тень теемс Идемевсенть. Тонась пек кежиявты Ная лангс, сон пели Сурайде, эдь Идемевсентень уш понгонесь виев эрзянь цёранть пельде, ды тандавксось пеельсэ лазсы сонсензэ Наянь.

Аволь умок операнть кунсолызе покш комиссия, козонь совасть экспертт республикань Культурань министерствасто, композиторт, режиссёрт, Театрань деятелень союзонь члент ды сынь прасть вемельс – «Легенда древности» операнть эряви путомс покш сцена лангс И.М.Яушев лемсэ музыкань театрасо. МР-нь искусствань заслуженной деятелесь Н.Н.Митин тешкстызе: «Оперань музыкась эсензэ средстватнень вельде седеяк виевгавты, полады ды панжи образтнэнь. Те сочинениясь туи мельс аволь ансяк секс, мекс сюлмавозь кезэрень раськень ундокстнэнь марто, эйсэнзэ истя жо ули тонавтомань смусть, сон лангс ливти ломанень эрямонь питнейчинть. М.Н.Фоминэнь оперась, арсян, саи башка тарка ды муи эсензэ ваныцят».

«Легенда древности» произведениянть мельспаросо вановлизь бу Саран ошонь эрицятнеяк ды инжетнеяк. Ламот инжетнестэ бажить седе ламо содамс тесэ эриця раськетнень культурадост, мифологиядост, оршамопельтнеде, койтнеде-кирдатнеде, кезэрень геройтнеде. «Легенда древности» оперась ули эрзянь раськень виевчинть-мазычинть, койтнень-кирдатнень, моротнень паро невтемакс-содавтомакс. Кемтяно, оперась карми путозь кода рузонь, истя эрзянь кельсэяк. Сон седеяк кастсы-кемекстасы тиринь келентень вечкеманть ды кепедьсы мокшэрзянь раськенть самосознаниянзо.

Неень шкане авторось совавтсь полавтомат партитурантень, либреттонтень. Оперась мереви путомс И.М.Яушевень лемсэ музыкальной театрань сценанть лангсо республикань Культурань министерствань экспертэнь комиссиянть мелензэ-арсеманзо мельс саезь.

М.ДЕВЯТОВА



Обращение представителей народов России

Подписка на 1-е полугодие 2018 г.

ВТОЦ призывает демократические страны защитить коренные народы России от насильственной ассимиляции

К ЧЕМУ ПРИВЕДЁТ РОССИЮ ЛИКВИДАЦИЯ КОРЕННЫХ НЕРУССКИХ НАРОДОВ

Послание из прошлого

«Сиянь толгась» — Мордовиясо!

«Исчезновение татарского языка в школах ведет к исчезновению татарской нации. Вы этого хотите?»

ТЕ ОПЕРАСЬ КАРМИ АЛКУКСОНЬ КАЗНЕКС

Арсемам, монь арсемам… Нуянь Видяз

Кулят Эрюш Вежаень пельде



главная новости архив номеров ссылки гостевая книга