На главную страницу 
cделать стартовой   в избранное  



Культурно-просветительская газета татарской общины Республики Мордовия

Мордовия - Информационный портал Республики Мордовия - Морис.ру

Мелькужо Эрзянь Мастор - Форум Страна эрзян, эрзянский форум

Голос Эрзи


Верьга ливтний нармунь

Зярыя арсемат Мацьказонь Лёфайде

-------------------------------------

«Сятко» журналсо печатазь меельце ёвтнемам лемдякшныя аламнеде прянь шназь ды мик наянгалезь «Уцяскаван!» Ды кода, видеяк, а улемс истямокс, зярдо вармакс ливтиця эрязь ием перть вастневинь, ульнинь малавиксэкс ламо превей, ламо содыця, эрямонть питнензэ содыця ды Чачома Масторонь вечкиця ломань марто.

Пензасо тонавтнемдон ледстнемакс кадовсь Михаил Абрамович Этингер химикесь (еврей), ламо иень ютазь тень чарькодиця ялгакс ульнесть Надькин Дмитрий, Маризь Кемаль, Шаронов Александр, Мусалёв Григорий ды лиятне – «Масторавань» чапицятне. Валдосто палыця штатолокс содавтнесамам Маловонь лемезэ. профессортнэ Хрущёва Елена Петровна, Цыганкин Дмитрий Васильевич, Ткаченко Орест Борисович (украинец), Откересь Девятаев Михаил, позиянь вечкицясь-содыцясь Егоров Владимир (мокшо), Биккинин Ирек (татарин) Калаганонь Керяз, Гайнинькань Пичай, Ёгань Минька, Аношонь Тумай, Пенза ёнксонь чачома келест вечкицятне Грачёва Екатерина, Исаень Миколь,... Вельть ламо тарка эряви – ледстямс весень, кинь марто свал, та-ков эрязкалезь эскелясть аволь аламо чим-ковом.

...Саран ош. Кизэнь маней валске. Обкомонь кудонть вакска апак капша эскелян алов, «Эрзянь правда» газетанть пелев. Текекс кирди тона ёнов ки кие-бути асодавикс цёра. Седеем марясь: те ломанесь – эрзя. Истя лисськак. Эрзякс пшкадемам каршо мизолдыця кургозо казсь тень эрзянь валт. Ёвтыя юртлемем, сон тень – Лежиков Алексей Лукьянович. Истя 1990-це иетнень ушодомсто васенцеде мария те юртлементь ды теевинь содавиксэкс сонзэ кандтницянзо марто, кона мейле путы эстензо эрзянь лем – Мацьказонь Лёфай, ды кона марто ламо иень перть карматано ускомо, носкозь-пуснезь, зяро виенэк сатыть, эрзянь чикордыця крандазонть .

«Эрзянь Мастор» кулялопась Лежиков юртлементь неизе 1997-це иень ацамковонь 16-це чистэ. «Икелень шканть лепштязь» рубриканть ало лисекшнэсь тешкскезэ- «Церьковадонок». Сонзэ саекшнынек «Эрзянь правдасто». Алганзо печатазель Нуянь Видязонь кулязо: «Симилейсэ микшнить келест. Зяро макснить?» Омбоцеде, таго «Эрзянь правдань» трокс ( 9.05.1998) минек юткс совась Лежиков А. Л. арсеманзо марто «Кодамо пазось седе кеме». Те ульнесь 1998-це иень аштемковонь 16-це чистэ.

Вана истя стамбарнэ, апак пижне-лажно, апак эвте невтинек Мацьказонь Лёфайнень Эрзянь Масторов тердиця аволь валаня кинть. Окойники, 1999-це иестэ Алексей Лежиков покш, сонзэ коряс, материалонзо марто эскельдясь минек кулялопанть тарчксонзо (поровтонзо) трокс. «Мекс истя эрятано или чем утешить Утешева» - лемдязель се, васенце сёрмадовксозо «ЭМ»-с («ЭМ», 1999.04.06). Сёрмадозель, кода мейле весе ёвтнеминензэ, истя ванькстэ, кодмояк редактор эзь эряво. Те эскельксстэнть саезь ушодовсь Мацьказонь Лёфай, сонзэ ояксчисэ эрямозо, сеске теевикс тензэ вечкевиксэкс газетасонть. Зяроксть седе мейле валгонесть «ЭМ»-нь лопа лангс ёвтнеминензэ комсь иень перть – ловить азё! А ловомс эряволь. Койсэнь, аволь вейке сядо. Паряк, муеви, учови сы шка, ломань, кона топавтсы те эрявикс тевенть. А эряви стувтнемс лисснесть-печатавсть сёрмадовксонзо зярыя кельсэ ды зярыя омбо масторсо.

Мезде, кода пингензэ перть сёрмадсь Пазонть пельде кучозь журналистэсь? Мекс, теке басом, а сёрмадеесь? Лежиков А.Л. — художествань кавто книгань автор: «Каргонь ки» (1991 ие) ды «Мезть ульнесть весть» (2011 ие). Секскак…

Тематнеде. Весемеде малавикст, монь ловомга, ниле. Васенце таркасо эрзянь келенть ды литературанть неень ды сыця шкаст-уцяскаст. Ризнэвтсть сонзэ сынь, удома сезневтсть. Мель явсь — омбоце темазо — топонимикантень, велень-ошонь ды леень-эрькень кезэрень лемтненень. Сонзэ версиятне сынст юрдост киньгак-кодаткак кавтолдомат эзть вельмевтне. Мерят, топонимикась—вешницянть эрямонь смустезэ, профессиязо. Колмоце темась: бачкатне. Эзь ютне нулгодькс тевест вакска. Эзинзе, эзинзе вечке, витькстамо, крёстонь кандтницятнень! Аволь чуросто кучнесь кулят-ёвтнеминеть, малав свал раксевтицят, дипломатнэнь эрямосто ды эрямодост. Мельсэнь Расул Гамзатов марто вастомазо ды ёвтнеминесь, кода Примаков министранть кортамонзо Лёфай дипломатось рузонь кельстэ ютавтсь туркань кельс.

Лежиков-Мацьказонь Лёфай – нурька прозань колчи (мастер). А книгасонзо, а кулялопань ламо-ламо публикациясонзо кувака сюжет марто ёвтнема а муят, сонзэ весе ёвтнеминеть - эссэть. Эйсэст аламо валсо невтевить эрямонть келей ды домка чизэ, невтевить мизолкст, сельведть, кежть...Те жанрасонть эсь шкастост сёрмадсть рузонь сёрмадейтне Владимир Солоухин ды Виктор Астафьев. Сынь згилить, пачколить натой раксемас, ды теньсэ витить ёжо. Кие-бути превейтнеде мерекшнесь: «Нурькачись — талантонть сазорозо». Те – Лёфайдеяк.

Аволь чуросто пачколесть сельмень икелев истят текст – а содат мезе мартост теемс, ушоды пряловажат лазнотомо. Эйсэст домка смусть, проблема, кона сонсь эци номерс, а сёрмадозь истя, а содат кона ёндо эйзэнзэ кундамс. Мацьказонь Лёфай… Ваксозонзо путомс а кинь. Ве витевкске а совавтови текстэзэнзэ. Истя ванькстэ сон сёрмады: кодамояк витнема тензэ а эряви! Марсекшнынь, Александр Твардовскоень теевксэнзэ, стихензэ-поэманзо ютнесть печатамо апак витне. Ванькстэ сёрмадсь Иван Сергеевич Тургенев. Кода сынь, важоди Шаронов Александр.

Вастневемадонок кадовсть зярыя, прок весе исяк ульнесь, ледстнемат.

«25 августа 2009 года. Верховный Суд Российской Федерации рассмотрел заявление Прокуратуры Республики Мордовия о прекращении деятельности газеты «Эрзянь Мастор». Суд не удовлетворил заявление и оставил в силе решение Верховного Суда Республики Мордовия от 30 июня 2009 года в том, что в газете не содержатся публикации экстремистской направленности».

Судонь промкскетнесэ ульнесть мартонок Мацьказонь Лёфай, Ирек Биккинин ды Степанова Раида. Те макссь тенек вийть седе нардевстэ аштемс кулялопанть кис.

2015 –це иень даволковсто од, од ятонь каявома ЭМ-ть лангс.

«Верховный Суд Российской Федерации рассматривал иск Федеральной Службы по надзору в сфере связи и информационных технологий о прекращение деятельности газеты «Эрзянь Мастор» (Страна эрзян). Суд не удовлетворил иск истца».

Газетатнень-мезтнень мельга ванныця Службась чумондсь кулялопанть бачкатнень, келя, берянь, раужо ёндо, покордыця невтеманзо кис. Ванновсть, лиятнень ютксо, А. Лежиковонь ды Дригань Толаень статьяст. Службань экспертнэ тандавтнесть: истят сёрмадовкстнэ кирвазтить религиятнень ютксо тол.Судьятне, зяро эзть сокаря, мезеяк истямо эзть муе («ЭМ», 16.02.2015).

...Зярыя вастневемастонок а нардтневиця ледстнемакс кадовсь Россиянь келес аламо тиражонь кулялопатненень алтазь конференциясь. Ютавтозель Москов ёнксонь Истрань буесэ. Эрзятнень пельде ульнинек Лёфай ялаксом ды мон, Видяз лелязо. Ветицязоль промксонть ламоннень содавикс Зорин Владимир - кол спец аволь рузонь раськетнень «куломадо идицясь».Сон ды сонзэ бригадазо ведь валсть пуло алга зярыя-зярыя часонь перть.Мелезэнек седе тукшность юткошкатне. Ульнесь ён кортнемс, кевкстнемс кода пиштить минек кондятне лия ёнкстэва.

Мон каштангалинь Лёфай вежняем марто улемадонть, якинь мартонзо, кунсолынь, ванынь. Озынек финэнь-карелэнь ялгатнень юткс – корты, прок чачома келезэ, суоминь кельсэ. Понгсть сельменек икелев грузинт, сон - …грузинэкс. Ушов лисезь вастовсть тенек азербайджанонь оглыть – Лёфай мартост сынст кельсэ. Тенень тунь эзинь абунгадо. Сынст ды туркатнень келест ве куронь. А туркансенть Лёфай содасы туркатнеде парсте.Башка стувор экшсэ кортнесть кить-бути англань кельсэ. Лёфай мизолксонь апак кекшне, «рамиця» вайгельсэ пшкадсь сыненст сынст кортамонь кельсэнть. Тесэяк эзинь абунгадо: модамасторсонть а муят дипломат, кона аволизе сода англансенть.

Эзия сестэ кевксте зяро кельсэ корты журналист ялгам. Паряк, стувтовськак. Шкадонть оно зяро ютась. Маряви, кавксошка соды. Се конференциясонть редякшныя обуцянь лия ёнксонзояк: куроксто муемс эрявикс валт ды совамс асодавиксэнть потс, теевемс содавиксэкс, бути эряви ялгакс. Те ёнксось, маряви, сонзэ икелень профессиястонзо.Те тевсэнть истямокс эряви улемс.

Кода эрзятненень пря а шнамс, кирдемс каштанчи, кор — лиссь юткстонок истямо ламонь содыця,Чачомо Масторонь вечкиця истямо цёра. Мацьказонь Лёфай – Эрзянь раськень Откерь (Национальной Герой). Ламонень чарькодемс тень стака. Вана мекс. Сон урендясь, служась Отечествантень. Урендясь ды…вечксь. Вечксь Чачома Масторонзо - Эрзянь Масторонть, сонзэ Келензэ, Историянзо, Раськензэ. Эрясь сон кавто эрямосо – урендицянь ды вечкицянь. Кандомс истямо сталмо – стакадояк стака. Чуросто кинень кепедеви. Кандомадо а мезть ледстнемс. Вана мекс Эрьмиёвань цёрантень Мацьказонь Лёфайнень максан лем: Эрьзянь Раськень Откерь.

Берянь, пек берянь – ламот, эрзятнеде истятнэде мезеяк, тунь а содыть. Мик а содыть кить сынcь, косто састь, кить тетяст-авст.Зярыя иеде икеле Отрадной ошсо (Самара ёнксс) вастневинек тосонь эрзятнень марто. Залсонть колмо сядодо ламо. Весе эрзят.«Кие Арзамасонь Олёна? Кепединк кеденк..», - пшкадинь залонтень. Каршо пилень кутькиця кашт ды кепедезь вейке кедь (Дригань Толаень). Мезть теде мейле кортамс…

Весть кода-бути Московсо улемстэнь совсинь Лежиковтненень. Лёфай ськамонзоль. Паро мельсэ сувтнинек кортамосонок эрзянь келень, раськень стакачитнень. Дисскусиянок прядозь кудазорось таркастонзо стямсто мерсь:

- Эрь эно, тешкстасынек вастовоманок!

– Мекс, видеяк, а тешкстамс? – поладынь валонзо. – Каня эрьва кодат самитнэ ютнить стувортомо…

Кудазорось чатьмонезь нолдызе чайникенть - путсь лакамо ведь. Эскельдясь каршонок сервантонтень ды сайсь тосто пелькашка цивторкай, паро, теке налкшкеть, кечинеть. Вановтом вакска сынст вишкачист ды кувтолдомаст эзь юта. Стуворонь пурныцясь тень редизе.

– Мезе ванат, арсят, путан икелеть, кода тесэ,лагунонь покшолмасо кедьгеть? Турциясо, леляй, ансяк истямнестэ симнить. Тон ней, ловт, аволь Московсат - Турциясат, - пеедькшнезь-кортазь каясь икеленэк «пелькинетнес» кофе, чульть-чальть учозь нуртясь пси ведь. Кофень аёвтавикс тантей чинесь пештизе нупаленть ды судоварятнень.

– Кунсолока, - кода-бути казямосто сезия азоронть кортамонзо, пшкадинь допрок лиядо каваницям туртов - Аброськин генералось, келя, тынк велень, истя?

– Педе-пес! Минек…

– Паряк, гайневтяно тензэ, а?

– Мекс а гайневтемс, номерэзэ ули?

Стинек стуворонть экшстэ ды ютынек телефон марто тумбочканть ваксс.

Кортамонок нурькинель. Лёфай, мейле мон, ниле –вете валсо ёвтнинек эрзянь келенть кувсемадонзо, энялдынек, мейсэ лездави, – лездамс. Каршо марявсть«да-да-дат». Сынь пилесэнь гайгить кеветее иеде ламо.

Зяро-бути иень ютазь вастовинек, ледстия Лёфайнень умонь се кортамонок Аброськин Миколь Покш генералонть марто, кона прядокшнось зоотехниянь отделения Мордовиянь университетсэ, ды чачсь превсэнь мель кевкстемс Лежиков полковникенть:

– Лёфай вежняй, ёвтык, мекс истя стакасто, кижнэзь лекси эрзянь келесь? Эль а кулы…

– Мхы! Кевкстнят…Генералонок прядо велькска! Вана мекс…

Неть колмо валтнесэ ёвтынзе, кинь кевкстия, весе-весе тувталтнэнь, конатне пачтимизь отьманть чирес. Виев раськесь саи-лепшти лия раськетнень вейкень кис: сынст вийсэ саемс лия раськеть ды келейгавтомс эсь ёнксонзо.

Мацьказонь Лёфаень эрямодонзо ледстнезь, сонзэ эрудициядонзо арсезь, эцезь эци прязот кевкстемась: мезекс, кикс кармаволь сон, аволизе прядоя Московонь раськеютконь институтонть. Монь койсэ, лисевель эйстэнзэ келейстэ арсиця, видечинь кис аштиця, ламо книгань автор доктор-лингвист эли масторонь келес содавикс сёрмадей. Ансяк уцяскадот кудопотмарс а кузят, копорьёнткак а велявтат. Мезе лиссь – лиссь. Лиссь дипломат – филолог.

Нуянь Видяз,

Саран ош



ПОХОРОНЫ С Ъ Е З Д А

ВЫБОРЫ ЛИ ПРЕДСТОЯЩИЕ ВЫБОРЫ?

Вова два процента

Чачома чи марто!

ПОЧЕМУ НАРОДЫ ИСЧЕЗАЮТ?

Среди эрзянских СМИ газета «Эрзянь Мастор» первой перешла на свободную лицензию

Лукояново - «Эрзянь Лисьмапря»

Опечатка.

Верьга ливтний нармунь

Лефай покштядо сэредиця валт

Выступление Инязора на панихиде А.Л.Лежикова в Москве

Кемтядо?

ИЛИ ХОРОШО, ИЛИ НИЧЕГО - КАК О ПОКОЙНИКЕ

ТУИЦЯНТЕНЬ. Мацьказонь Лёфай

Ков тон истя? Александр Арапов

Словарь «Сырнень човалят» готов к печати!

«РУЦЯ» ЭРЗЯНЬ ЛЕЗЭПАРГОНТЬ МЕЛЕЗЭ



главная новости архив номеров ссылки гостевая книга