На главную страницу 
cделать стартовой   в избранное  



Культурно-просветительская газета татарской общины Республики Мордовия

Мордовия - Информационный портал Республики Мордовия - Морис.ру

Мелькужо Эрзянь Мастор - Форум Страна эрзян, эрзянский форум

Голос Эрзи


ЭРЗЯНЬ КЕЛЕНЬ ЧИСЬ ЛИВТИ МОДА-МАСТОРГА

Эрьва раськесь пурны эстензэ оймень сюпавчи пингеде-пингес. Эрзятне текекс пелькскень-пелькске таштыть ды сюпалгавтыть оймень таштамотнень. Аволь умок, 24 иеть, кода ульнесь арсезь-теезь (а, паряк, вельмевтезь?) неень шкань од Покшчи—Эрзянь келень чи. Чадыковонь 16 чись, те А.П.Рябовонь профессоронть, келень-грамматикань пурныцянть ды нолдыцянть, сермадеенть, эрзянь раськень ине ломаненть   чачома  чизэ. Неень шкань эрямонтень те чись совась домкасто ды, кемеви, пингеде-пингес. Сон тешкстави течи Россиянть, ды, аволь ансяк, келес, косо эрить эрзятне. Те иестэнть Эрзянь келень чись прась Инечинть марто ве чис. Секскак тешкстамонтень совасть поладкст, конатне, маряви, седеяк келейгавтызь, сюпалгавтызь ды кувалгавтызь сонзэ ютавтома коенть.

Чадыковонь 13-це чи, Вирь Тавла веле, Йовлань-Олонь лемсэ «Этно-кудо».

Теевсь паро коекс тешкстамс Эрзянь келень чинть те содавикс эрзянь ломантненень  музейсэнть. «Эрьмезь» чувтосто керсиця вейсэндявксонть ды музеень важодицятнень мелест коряс, пуромсть Эрзянь келень чинть тешкстамо Вирь Тавла велень школань тонавтницятне тонавтыцяст марто, Октябрь буень Горяйновка велень школань тонавтницятне эрзянь келень тонавтыцяст марто, Октябрь буень Пакся Тавла велень «Толава» эрзянь моронь морыця пурнавксось. Теде башка, те покш чинть тешкстамо састь Кочкуронь буень культурань отделстэ, Эрзянь ды мокшонь съездэнь Исполкомонь важодицятне, «Мерема» содавкс фольклоронь пурнавксонь кой-кона морыцятне ды Тавла велень эрицят.

Васняяк сыцятне пуромсть «Этно-кудонь» чувтосто мазыйстэ керсезь ортатнень ваксс. Тесэ сынст каршо арасть эрзятнень свалшкань Озатясь Л.Чингаев ды музеень важодицясь Р.Водясова кши-медь марто. Ютавтсть, алтазь Эрзянь келень чинтень, озксонь кой. Штатолонть кирвазтизе содавикс чувтосто керсицясь А.Рябов. Покш чиденть ёвтнесь «Этно-кудонь» прявтось П.Рябов. Весе сыцятне, паро мельсэ,  сюлмасть сюлминеть пирявксонтень. Секс, мекс те таргось ульнесь Эрьбань тарго, «Толавань»  морыцятне весе сыцятнень ютавтызь ортатнень пачк, тешкстнесть весень эрьбинесэ ды морасть сынест, паронь арсезь, эрьбань чинь морынеть.

Мейле весе сыцятне совасть «Этно-кудос». Тыц эцевсь музеень апокшке нупальнесь. Тесэ ютавтовсь Эрзянь келень чинтень алтазь сех питней пельксэсь.  Васняяк стядо пурнавозтне кунсолызь педе-пес кезэрень эрзянь моронть «Тюштя», «Торама» фольк-группанть  пельде. Ве минутань чатьмонемасо кундызь Ине эрзятнень лемест. Мейле  паро валт евтась Вирь Тавла велень школань прявтось О.Гангеев ды мик морызь, Маша тейтернензэ марто, «Эрзянь кель» морыненть. Келенть ды раськень неень шкань стака тувталтнэде домкасто, смустень кандозь евтнесь Горяйновка школань прявтось Л.Чингаев. Кочкуронь буень культурань важодицясь Ю.Ваньков тешкстызе Эрзянь келень чинть питнейчинзэ ды мазыйчинзэ. А.С.Лузгин эрзянь ды мокшонь Исполкомонь прявтонть полавтыцясь, маряви, васенцеде, педе пес ёвтызе эсь арсеманзо эрзянь кельсэ, мелень путозь. Эрзянь келень чинь тешкстамось прядовсь вишка концерткесэ, морасть ды евтнесть валморот школань тонавтницятне, «Толава» ды «Мерема» фольклоронь морамонь пурнавкстн, ды  казнень явшемасо. Истямо тешкстамось витинзе сыцятнень мелест, валдомгавтынзе оймест.

Чадыковонь 17 - це чи. Саран ош.

А.С.Пушкинэнь лемсэ библиотека.

Библиотекасо пурнынзе сыцятнень тешкстамо Эрзянь келень чинть Эрзянь келень идема Фондось. Те иестэнть эрзятне путсть покш мель тешкстамонтень. Залось, ловт, ульнесь пешксе. Эрзянь келень идема Фондось аштесь ушодовкссо те покш чинть теемасо, секскак эрьва иень тешкстамось раштась свалшкань койть. Коень коряс совамо нупальсэ ульнесь ютавтозь регистрация сыцятнень. Редявсть ламот эрзянь оршамосо оршазь ды мельспаросо аштиця ломанть.

Вана гайгезевсь торамань гайтесь, весе стясть, залонтень ютасть эрзянь инязорось Кшуманцянь Пиргуж ознома кече марто ды «Торама» содавикс курось. Сынь моразь кузсть сценанть лангс. «Тюштянь»  морось свал кирвазти-вельмевти кезэрень эрзянь ёжонь марямо, коронь кепедема. Кшуманцянь Пиргуж яволявтызе 2016 иень Эрзянь келень идема Фондонь Лауреатонть. Лауреатокс кочказель И.Ф.Эрзяйкин. Те иестэнть, кода и свал, Фондонть пельде ульнесть максозь шнамо лопат ошонь эрзянь келень тонавтыцятненень ды сехте паро тонавтницятненень. Инязорось евтызе Прявткуронь меленть — максомс эрзянь казема тешкс «Ине эрзя» «Масторава» эпосонть пурныцянтень ды сёрмадыцянтень А.М. Шароновнень.

Сехте мелень топавтыця пелькскекс ульнесь «Руця» Фондонть пельде, валморонь содавикс сермадыцятненень — Т.Мокшанованень, Л.Рябованень, А.Подгорнованень — казнень максомась. Сёрмадыцятне весень кецявтызь эсест валморосо. Те промксось ловови Эрзянь келень идема Фондонь отчетной промксокс. Секскскак Инязорось ёвтнизе, мезе ульнесь теезь иень перть, кодат тувталт эзть лезда эрзянь келенть эрямос домкасто совавтомантень, кодат терть-пирявкст вастневить эрзятнень ки лангсо.Ёвтызе сех покш мелявксонтькак, «Пургаз» Фондонь ярмактне  велявтовсть ды ней таго эряви путомс покш вий Пургазнэнь кеврунгонь стявтомантень. Ревизионной комиссиянь прявтось Т.М. Ёгина текекс кемекстызе ярмаконь тувталонь нардамонть коряс. Е.В.Четвергов ёвтызе, кодат стака чить сави пачтемс эсь книгань нолдавомасо ды ловныцянтень пачтемасонть. Кортнемс сайнесть мель Национальной политикань ды культурань министрась А.М.Чушкин ды сонзэ полавтыцязо А.И.Карьгин. Эсь мелензэ ёвтызе эрзянь ды мокшонь съездэнь Исполкомонь прявтонть полавтыцязо А.С.Лузгин. Промксонь прядома лангсо кочказель 2017 иень Прявткурось, козонь совасть сисем ломанть. Седе тов, коень коряс, ульнесь путозь цецянь пусмо ине скульпторонть С.Эрьзянь кеврунгонть лангс.

 

Чадыковонь 19-23 чить, Эстония,

Таллин.

Эрзянь ломанень «Сятко» вейсэндявксось, конань прявтозо эрзянь тевень содавикс ветицясь Наталья Абросимова, те иестэнь аламодо полавтызе свалшкань Эрзянь келень тешкстамо коенть. Тувталтнэ истят: васняяк —  те Инечись, мейле — Фенно-Угриянь сюлмавксонь 90 иень тешкстамось, мейле — алтазь те чинтень цела пусмо чувтосто керсемань выставкат ды мастер-класст,  конатнень ютавтомо тердизь Вирь Тавла велень «Эрьмезь» чувтосто керсицятнень, Россиянь артыцянь вейсэндявксонь ломантнень — Василий Ширманкинэнь ды Пётр Рябовонь. Невтематне ды мастер-класстннэ «Сятко» вейсэндявксонь аватнень марто сюпалгавтызь эрзянь келень ды Фенно-Угриянь юбилеень тешкстамонь читнень. Программась, конань анокстакшнызе Н.Абросимова, сюпаволь эрьва кодамо пелькссэ.

Васенце чистэ Эстононь келень институтсо ютась ненецэнь чокшне. Тесэ морась ды ёвтнесь ненецэнь койтнень-кирдатнень, фольклоронь  содыцясь Татьяна Лер. Институтсо ульнесь вастовома прявтонть Тыну Тендер ды Фенно-Угриянь важодицянть Яак Прозес марто. Те чокшнестэнть сыця ломантне теевсть содавиксэкс Вирь Тавла велень чувтосто керсицятнень шкинемаст ды удмуртонь артыцянть С.Антиповонь артовксонь пусмонзо марто, кона лемдезь «Финно-угрань музыкальной мир». Те невтемась панжозь институтонь нупальтнесэ.

Омбоце чинь мастер-классось, ютавтовсь рузонь эйкакшонь Ласнямяе гимназиясо 7-9 класстнэнень, пек токинзе тонавтницятнень ёжост. Истямо сынь зярдояк эзть некшне. Чувтосто керсевкстнэ «Эрьмезь» вейсэндявксонь мастертнэнь В.Ширманкинэнь, Д.Рябовонь, А.Рябовонь, М.Рябовонь, П.Рябовонь сайсть кавто покш стуворт. В.Ширманкин ёвтнесь эрзянь кезэрень седямо пелькстнэде ды сеске невтизе, кода тееви нудеесь. П.Рябов ёвтнесь, кить неть эрзятне, косо эрить ды кодат те раськенть оймень ды культурань питнейчинзэ, кодат ине ломанть листь эрзянь раськестэнть. Эрзянь кезэрень промысладо, тавлань налшкеде ёвтнемась поладовсь чувтонь лишминень теемасо, мезенть тееме варчнизь тонавтницятнеяк. Гимназиянь прявтонть полавтыцясь, Ирина Становая, весень пельде ёвтась сюкпря те апак учо казненть кисэ. Паро мельсэ тешкстызе, кода парсте тесэ важоди финнэнь келень ветицякс Н.Абросимова.

Теке чинть Куму артомань музейсэ, кона ашти Эстониянь президентэнть кудонзо вакссо ды ловови Европань сехте паро музейтнень ютксо вейкекс, ютавтозель Фенно-Угриянь сюлмавксонть 90 иень юбилеезэ. Те покшчинть программась арсезель келейстэ, домкасто ды превейстэ. Фенно-Угриянь весе историясь ульнесь невтезь концертэнь невтемасо. Лемезэ «Нармунень ки». Арсицязо ды путыцязо — Мария Корепанова, Эстониянь келес содавикс удмурткась. Проектсэнть покш тарка явовсь Вирь Тавла велень «Эрьмезь» вейсэндявксонь чувтосто керсема выставкантень, конань сыцятне ванность паро мельсэ. Невтезель кинофильма, косо Яак Прозес ёвтнесь Фенно-Угриянь чачома чидензэ, архивень конёвтнеде ды кудодо, косо 1927 иетнестэ панжозель Фенно-Угриясь. Кинонть  песэ невтизь финно-угратнень валост-мелест чачома чиденть. Мельспарокс ульнесь неемс «Мерема» морамо пурнавксонть ойме валосткак. Эрзятнень пельде, «Эрьмезь» вейсэндявксонть пельде, кавто-колмо валт евтась Калаганонь Керяз ды казсь Тавлань керсевкс.

Колмоце чинть теезель вастовома содавикс скульпторонть, ава ломаненть, Тийю Кирсипуу марто Таллинэнь артома университетсэнть. Сон невтнинзе шкинемань факультетнэнь ды ёвтнизе, кодамо тувталс эртевкшнить шкинемас тонавтома тевсэнть.

Теке чистэнть Тарту ошсо,  Фенно-Угриянь арсезь секе проектэсь ульнесь невтезь Эстониянь раськень музейсэ. Те музеенть домкачизэ ды покшолмазо ловови весе Европань сюпавчикс. Музеесь теезь одс ды тесэ максови покш тарка весе Росиянь финно-угратнененьгак. Кудось арсезь ды теезь неень шкань технологиятнень коряс. Тесэ пурназь ды невтезь материальной, культурань, историянь, социальной ды оймень (духовной) эрямось. Ули тарка эрзятненьгак. Музеень совамо нупальсэ ульнесь панжозь покш невтема Вирь Тавла велень чувтосто керсевксэнь.Те невтемань панжоманть ютавтызь  «Сятконь» аватне. Оршазь эрзянь оршамосо, цитниця сельмсэ, сынь невтизь эрзянь ойменть, культуранть да эрзянь келенть мазычинзэ. Тесэ Н.Абросимова ламо кельсэ кортась сыцятнень марто ды тейсь содавиксэкс васолдо сазь инжетнень шкинемаст марто. Валдо тештинекс ульнесь свалшкань ялгатнень Юлле Каукси, Эвар Риитсар, Айгар Тынесян марто вастовомась ды кортнемась.

Нилеце, туема чистэнть, Фенно-Угриянь кудосо максозель аволь покшке чувтосто керсемань мастер-класс ды невтема. Лембестэ ютась кортнемань, ледстнемань, кутьморямонь-сельведень, карадо-каршо казнемань ды ильтямонь кой. Весень оймесэ кадовсь а ёвтави тансть, ды, теке марто, нусманячи, сень коряс, мекс ули весеменень ушодкс ды пе. Ансяк эрзянь тевтненень зярдояк пе илязо са. Свалшкань эрямо эрзянь раськентень, келентень ды масторонтень!

Минь ёвтатано покш сюкпря «Сятко» вейсэндявксонтень, Фенно-Угриянтень ды минек ялгантень, Н.Абросимованень.

Калаганонь Керяз,

«Эрьмезень» ды Йовлань Олонь лемсэ

«Этно-кудонь» прявт,

Вирь Тавла веле



Подписка на II полугодие 2017 года

Первые подписчики!

СЮКПРЯ, МИКИТАНЬ ШУРА!

Эрзянь келень чи Саран ошсо

Обращение к эрзянам!

Вести с Красноярска!

Парламент Ингушетии впервые провел заседание на ингушском языке

Чувашские активисты потребовали изменить школьные программы ради чувашского языка

КТО ЕСТЬ КТО

Открытое письмо

ЭРЗЯНЬ КЕЛЕНЬ ЧИСЬ ЛИВТИ МОДА-МАСТОРГА

«Эрзянь келень чись» Покш Игнатвелень школасо

Эрзянь келесь эсь койсэнзе мазый, эрявикс, питней!

Доронина Любовь Петровна занесена в Книгу Почета Эрзянь Мастор

ВикиВесна—2017 интернет марафон статей приурочен ко Дню эрзянского языка

Стихи. Виктор Баркин



главная новости архив номеров ссылки гостевая книга