СЮКПРЯ, МИКИТАНЬ ШУРА!

Истя мерильть  чачома велесэнзэ  кизэнь перть кепе чийниця цёрынентень. Умок те ульнесь.  Вельть умок! Шкась – лей. Сон а  соды лотксемат. Чуди. Умок Шура – Шура атя, умок,  рузонь койтнень коряс, Алесандр Никитич.  Буйлемень коряс вана - Юркин. Кецни,  каштанчи кирди кудолемеэ-фамилиязо - эрзянь. Содавикстано кеменьшка иеде ламо. Ледстни, пшкалемс яла тензэ мери  икелекс, кода мерильть  эйкакшпингстэ – МИКИТАНЬ ШУРА. Кинень а вечкеви  куш превсэ-арсемасо, куш аламошка эрямс эйкакшпингень масторсонзо? Вечкеви Юркиннэньгак.

Седе парсте содаса сонзэ  обуцянь истямо ёнксонзо: вечксы эрзянь келенть. Талны, ризны, мелявты кисэнзэ. Васень ризксэзэ – те «Эрзянь Мастор» газетась. Сонзэ эрявиксчизэ, сонзэ тевензэ, орманзо-тармонзо свал кирдевсть седе ёжосо. Превсэнзэ теке: эри кулялопась – эри эрзянь раськесь, эрить эрзятне. Газетавтомо… Печатамс, нолдамс  сонзэ типографиясо  интернетэнть ды лия нежетень лангс нежедезь а стака. Тееви те вейке ломанненьгак. А вана пильгть тензэ кастомс – муевель яннэ ловныцянть элес – тевесь стака, седе виде ули, стакадояк стака. Мекс? Тувталтнэ кавто: кикендявозь, пельс коськезь  эрзянь оймесь ды кирдийтень каршо, видьстэ мерезь, молемаст эрзянь келенть каршо.

Тень парсте чарькодьсы Александр Никитич. Секс а пазонть, а кирдийтнень лангс пек а кеми. Лангозост апак кеме кундась сёрмадстомань тевентень сонсь. Эсензэ машинасо чачома Чаунза буензэ  ушкс-трокс ардтнизе аволь весть, аволь кавкстькак. Вастневсь содавиксэнзэ, школань тонавтыцятнень, седе арсиця ломантнень марто. Ёвтнесь эрзянь историядонть, культурадонть, кельденть, «Эрзянь Мастор» кулялопадонть, вастневикс стакачидензэ. Ардтнеманзо, мелявксонзо, аволь аламо пултазь бензинэсь стяко эзть ёма. 2016 –це иень васень пелькстэнть мусь-пурнась 79 сёрмадстыцят-ловныцят. Ламо-аламо?  2017 –це таштавсть ансяк 31. (Питнесь зыян тейсь).

Муевельгак  А.Н.Юркинэнь  кондямо  эрзянь эрьва районсо уш вейке ломань, тевенек течи улевельть допрок лият, ламоксть седе вадрят, седе кецневтицят.

Келей  эскелямо теть, Микитань Шура, ды мельгат молицят!

Нуянь Видяз