На главную страницу 
cделать стартовой   в избранное  



Культурно-просветительская газета татарской общины Республики Мордовия

Мордовия - Информационный портал Республики Мордовия - Морис.ру

Мелькужо Эрзянь Мастор - Форум Страна эрзян, эрзянский форум

Голос Эрзи


«ЭРЗЯНЬ ОЙМЕ-2017»

Эрзянь раськень сёрмадома шкинемань  Казнень максомадо «РУЦЯ» эрзянь Лезэпаргонть  яволявтомазо.

«Эрзянь ойме-2017» - сёрмадома эрзянь шкинемань Казнес  мелькевкстнемась ютась «Эрзянь вал» Интернет куросонть. Те шкас путозельть шкиневкст:

«Косо эрзянь велесь». Валморо. Мокшанова Татьяна.

«Лездак, мода!». Валморо. Ерёмина Мария.

«Мезе тонеть ёвтамс, ялга?». Валморо. Подгорнова Алина.

«Паз-тякатне авардить менельсэ». Валморо. Мамаева Юлия.

«Эрзянь Мастордо вал». Валморо. Рябова Людмила.

 Ванкшновсть сёрмадома шкиневкстнэ, конат нолдазельть ломанень сельме икелев 2016 иенть перть. Сынь печатазельть «Сятко»-со, «Эрзянь Мастор»-со, «Эрзянь вал» Интернет-куросо. Сынь весе путозельть «Эрзянь вал» курос. Ламо эрзятне ловнызь мелень путозь  ды путызь эсь тешксэст сеть шкиневкстнэнь каршо, конат седе пек тусть мелезэст.

«Руця» эрзянь Лезэпаргось, эрзянь ломантнень мелест  лангс нежедезь, сась мельс:

Максомс Арневкст (Дипломт) ды Казнеть сеть сёрмадейтненень, конань сёрмадовксост седе пек вечкевсть ловныцятненень ды кона сёрмадеентень, ловныцятнень мелест коряс, седе лади «Эрзянь ойме-2017» эрзянь сёрмадома шкинемань Казнень максомась.

 Арневкстнэ ды Казнетне кармить максовомо истя:

 Арневксэсь ды 4500 целковойсэ «ЭРЗЯНЬ ОЙМЕ-2017» Шнамо Казнесь максови Рябова Людмиланень «Эрзянь Мастордо вал» валморонзо кис.

Арневксэсь ды 4500 целковойсэ «ЭРЗЯНЬ ОЙМЕ – 2017» Шнамо Казнесь максови Подгорнова Алинанень «Мезе тонеть ёвтамс, ялга?» валморонзо кис.

Арневксэсь ды 6000 целковойсэ «ЭРЗЯНЬ ОЙМЕ – 2017» Прявт Казнесь максови Мокшанова Татюнень «Косо эрзянь велесь…» валморонзо кис.

Ярмактнэнь «ЭРЗЯНЬ ОЙМЕ – 2017» пурны «Руця» эрзянь Лезэпаргось» ломанень кедьга. Кирдивиесь те эрзянь тевентень мейсэяк а лезды. Тедеде те Казнентень каясь ярмакт вейке эрзянь ломань. Секскак Казнетне аволь покшт. Кинь ули мелезэ лездамс тенек те эрзянь тевсэнть, сюлмаводо «Руця» Лезэпаргонть марто.

Арневкстнэ ды «Эрзянь ойме-2017» Казнетне кармить максовомо эрзянь сёрмадейтненень Эрзянь келень Чистэ, Эрзянь келень идема Фондонть промкссо, Саран ошсо. Тердтяно Казнень саицятнень ды весе эрзятнень те покш промксонтень.

Эрязо-виевгадозо эрзянь келесь.

Касост эрзянь од сёрмадейть.  Виемезэ эрзянь сёрмадома шкинемась.

Ловнодо, эрзят, эрзянь кельсэ. Чарькодинк эрзянь келенть мазычинзэ.

Пингеде-пингес эрязо эрзянь раськенек, эрзянь келенек.

 «Руця» эрзянь  Лезэпаргось.

2017 ие, эйзюрков, 10-це чи

********************

«Руцянть» ПРЯВТ КАЗНЕСЬ максови те валморонть кис

Косо эрзянь велесь? Татьяна Мокшанова

******

Косо эрзянь велесь

Леенть вельксэс комась,

Тетянь-авань келесь

Оймем потмос оймась.

 

Эзган туезь-срадозь,

Монь арсеме тонавтсь,

Истя мелем кастовсь,

Тештес-менельс токавсь.

 

Зярдо тундо сакшны,

Весемесь пертьпелькссэнть,

Теке эйкакшшкасто,

Корты секе кельсэнть.

 

Гайги сон монь эйсэ,

Ков илязан чалга,

Свал эри седейсэнь,

Верекс чуди санган.

***

Татьяна Мокшанова чачсь 1984-це иень якшамковонь Самара ёнксонь Шенталань буень Баганя эрзянь велесэ. Прядызе Н.П.Огарев лемсэ МГУ-нь филологиТатьяна Мокшанова - Мордовия Республикань Прявтонь од сёрмадыцятнень туртов литературной премиянь лауреат (2010), Саран ошонь Литераторонь союзонь член (2006). Важоди «Чилисема» эйкакшонь журналсо. Эри Саран ошсо.

----------------------------------------

«Эрзянь ойме-2017» «Руцянть» шнамо казнесь максови те валморотнень кис:

Эрзянь Мастордо вал. Людмила РЯБОВА

***

Монь Эрзянь Мастором ламо пингеть эрясь.

Ламоксть сонзэ пелев нерькстневсь ятонь нересь.

Верьсэ валнось моданть, кона эрзят раштась.

Цидярдсь монь Мастором, вий эрямонь таштась.

Таго чачтась цёрат, таго чачтась ават,

Стявтнесь виев ушмант пирявксонзо прява.

Кородовксонь пинкссэ тапардызе прянзо,

Сех чопода таркас кекшизе олянзо.

Анокстась пшти торот ды кувака сялгот…

Аволь свал раськетне эрясть кода ялгат.

Монь Эрзянь Мастором эрзянь верьсэ викшнезь.

Зярдояк монь раськем моданзо эзь микшне.

Торонть каршо – торо, инжетненень – пуре.

Эсь Масторот кисэ аволь пежеть тюремс.

Олячинть питнензэ уречись содасы.

Ансяк олячисэ ине раське касы.

Ансяк тумось рашты сэрястонзо тумо.

Эрямо а маштат – тонсь улезат чумо.

Кезэрь пингень превтне эзть ванстово тенек,

Ды велькссэнек лайши эрзянь менеленек.

--------------------

Мезе тонеть ёвтамс, ялга? Алина Подгорнова

***

Мезе тонеть ёвтамс,

Лексян састо. Яксян ялго.

Мезде, кевкстнят, яла арсян?

Вейкеде: улян-арасян?

 

Яла, марят, саян конёв

Ды сормсян велькссэнзэ коням.

Гайтть-вайгельть умок а марсян,

Мелесь ювк: улян-арасян?

 

Кевкстнят, шумбрачим кодамо?

Куш нейке вирень керямо!

Ужо, нейке иля туе.

Мон, тонь койсэ, алкукс улян?

 

Мекс аволь чевтестэ ванат?

Содан, неть мельтне кершамат.

Ансяк кода, таго басян,

Чарькодемс: улян-арасян?

Эно иля сёвно-тенсе.

Те прявт кевкстема. Васенце!

Лиясто арсян, ялгакай,

Мон — олгосо эцезь няка.

 

Эйстэнь молить сядо суреть,

Сивесэнь сёрмадозь: уре.

Верде — пазонь, алдо — прявтонь.

Мель а раштат, вал а правтат.

 

Ванан — перькан эсень кондят.

Аволь эрить — сормсить конят.

Морост — кувака урнема.

Каня истямо улемась?

 

Те эрямось, ванан, ялгай,

Аулемас эйсэнь айги.

Ды секскак, зярс мелем гайги,

Сырнень таркас таштан вайгель.



КЕЦНЕВТЬ СЕДЕЙ, ЭРЗЯНЬ КЕЛЕНЬ ЧИ!

Подписка на II полугодие 2017 года

Лауреат премии им.Рябова - 2016

«ЭРЗЯНЬ ОЙМЕ-2017»

Эряви лездамс!

В СЕРДЦАХ ЛЮДЕЙ ПОСЕЯЛ СТРАХ

Нас сблизила «Эрьзянь Мастор»

«Викимедийцы, пишущие на эрзянском языке»

День эрзянского языка в Петербурге

Лёфай атя кецни ды мелявты...

Ломанть теиде паро тев!

Эрзянка спела на «Поле Чудес» частушки про Якубовича

«Од вий» в Саранске

«Предания старины» вновь прозвучат в Мордовии

Незрячие читатели Саранска отметили День эрзянского языка

Арсинь эрзякс мон — сёрмадынь рузокс...

Лавгаськин Охань эрямосто



главная новости архив номеров ссылки гостевая книга